Grikklandstöfrar - hinn fagri Pelópsskagi

Snemma morguns höldum við af stað í dagssiglingu til Hydru sem er með fallegri eyjum Grikklands og sú frægasta af Sarónísku eyjunum. Gullöld hennar var á 18. og 19. öld þegar hún varð miðstöð siglinga og verslunar en þar bjuggu margir færir skipasmiðir og auðugir kaupmenn sem byggðu upp öflugan flota. Skipstjórarnir efnuðust mjög og voru áberandi í mannlífi eyjunnar en skipstjórafjölskyldurnar tóku mjög virkan þátt í frelsisstríðinu gegn Tyrkjum. Hydra er um margt einstök en sökum þess hve göturnar eru þröngar og bærinn lítill og þéttbyggður eru þar engir bílar eða önnur vélknúin ökutæki, notast er við asna og báta. Um miðja 20. öldina var eyjan vinsælt athvarf listamanna, þar bjó lagahöfundurinn og söngvarinn Leonard Cohen um tíma og eyjan er einnig uppáhalds gríska eyjan hennar Sophiu Loren. Við keyrum fallega leið frá Nafplio til bæjarins Metochi og þaðan er tekinn lítill bátur yfir til eyjunnar. Á Hydru er stoppað í um það bil 4 klukkustundir og síðan er farið aftur í sama bátnum til meginlandsins. Við komum til baka í eftirmiðdaginn og eftir það er frjáls tími í Nafplion.

Eftir morgunverð er haldið áleiðis af stað til virkisbæjarins Monemvasia. Á leiðinni er komið við í miðaldaborginni Mystras sem stendur upp á hæð 620 m fyrir ofan Spörtu. Við skoðum þessa borg sem var reist af Frönkum á 13. öldinni en féll svo í hendur Býsansmanna, Feneyinga og að lokum Tyrkja. Hún er eins og lifandi safn en þar hefur enginn búið síðan á 19. öld. Eftir standa rústir um glæsta tíma þegar borgin var ein sú mikilvægasta á tímum Býsansmanna. Einnig verður tekið stutt stopp í Spörtu, sem var á sínum tíma mikið hernaðarveldi en í dag er hægt að sjá rústir sem vitna um forna frægð borgarinnar og þann metnað sem ríkti við að koma henni og samfélagi Spartverja á fót. Við endum ferð dagsins í Monemvasia en þar sem dvalið verður í tvær nætur. 

Rólegur morgun til að njóta hótelsins og umhverfisins sem er aðlaðandi og yndislegt. Í eftirmiðdaginn er keyrt til eina fjarðarins í Grikklandi sem ber nafnið Limni Geraka. Hann er í raun náttúrulegt lón en lögun hans minnir á fjörð. Við Limni Geraka er mikil náttúrufegurð, tært og kyrrlátt vatn og hlíðar vaxnar ólífulundum. Við tökum stutt kaffistopp til að njóta umhverfisins en keyrum síðan aftur til virkisborgarinnar Monemvasia. Bærinn er byggður inn í klettana á eyjunni og var höfuðvígi Býsansmanna og síðar Feneyinga á svæðinu. Við skoðum þennan fallega virkisbæ sem er eins og hann hafi staðið í stað í yfir 700 ár. Að lokum borðum við kvöldmat á fallegum veitingastað í Monemvasia virkinu.

Í dag er keyrt frá Monemvasia til Kalamata með viðkomu í strandbænum Gythion sem var eitt sitt mikilvæg höfn, meðal annars fyrir Spartverja. Samkvæmt goðsögninni um Helenu fögru og París þá stoppuðu þau í höfninni í Gythion á leið sinni til Trjóu. Þar er kjörið að staldra við fallegu höfnina, rölta þaðan um bæinn eða setjast niður og fá sér kaffisopa. Eftir ljúft stopp í Gythion er haldið áfram til hellanna í Dirou sem eru eitt mesta náttúruundur Grikklands og þykja með þeim fallegustu í heimi. Við skoðum þessa einstöku hella sem eru bæði á landi og í sjó. Frá þeim keyrum við stuttan spöl til þorpsins Areopolis þar sem borinn verður fram hádegismatur. Areopolis er yndislegur lítill bær með hefðbundnum steinhúsum og þröngum steinlögðum götum. Eftir hádegismatinn er haldið áfram til borgarinnar Kalamata þar sem dvalið verður á hóteli við ströndina í fjórar nætur.

Eftir morgunverð fer fararstjóri í stutta gönguferð um borgina og gamla bæinn í Kalamata en eftir það er frjáls tími til að versla, vera við sundlaugina á hótelinu eða til að sleikja sólina og synda í sjónum. 

Nú verður farið í dagsferð til Ólympíu þar sem skoðaðar eru fornleifar þessa fræga staðar sem er eitt mikilvægasta svæði fornleifauppgraftar á Grikklandi. Í aldaraðir voru haldnir íþróttaleikar til heiðurs Seifi, konungi guðanna og þarna er margt að sjá meðal annars æfingasvæðið, vinnustofu Fidíasar og hof Seifs. Í hofi Heru er ólympíueldurinn ennþá tendraður fjórða hvert ár fyrir Ólympíuleika okkar tíma og við sjáum einnig leikvanginn sjálfan þar sem leikarnir fóru fram til forna. Frá fornleifunum er gengið að safninu sem hefur að geyma dýrgripi og styttur sem grafnar voru upp á svæðinu. Hádegisverður í þorpinu Ólympíu áður en haldið er til baka til Kalamata.

Í Kalamata eru fallegar strendur með tærum sjó og gamli bærinn er skemmtilegur með sínum þröngu götum, sögulegu byggingum, kaffihúsum og mörkuðum þar sem mikið úrval er af vörum ræktuðum í héraði, meðal annars ólífum, ólífuolíu, hunangi og kryddjurtum. Kalamata er höfuðborg ólífanna í Grikklandi. Afbrigðið sem ræktað er í hinu frjósama Messina héraði er talið bera af með sínu magnaða bragði og er flutt út til fjölmargra landa. Hér er einnig úrval veitingastaða sem bera fram þjóðarrétti eins og souvlaki og moussaka.

Eftir morgunverð keyrum við frá Kalamata til Aþenu með viðkomu á vínbúgarði í héraðinu Nemea. Á búgarðinum býður fjölskyldan á staðnum upp á skemmtilega vínsmökkun fyrir þá sem vilja kynnast víni héraðsins en það er vinsælt bæði innan Grikklands og utan. Hér verður einnig borinn fram hádegisverður og síðan er haldið áfram til Aþenu þar sem er dvalið verður í eina nótt á hóteli í miðborginni.

Eftir þessa úrvalsferð er komin tími til að kveðja. Að loknum morgunverði höldum við á flugvöllinn í Aþenu þar sem flogið verður með Play til Íslands kl. 10:20 og lending að staðartíma í Keflavík kl. 13:20. 

Fararstjóri getur fært dagskrárliði á milli daga eftir þörfum þegar komið er á staðinn.