Sumargleði í Portorož

Í dag njótum við þess að vera á þessum fallega stað. Tilvalið er að nýta sér aðstöðu hótelsins til afslöppunar og einnig er dásamlegt er að ganga eftir strandlengjunni en þar er margt sem gaman er að kynna sér í rólegheitunum. 

Króatía tekur á móti okkur í dag. Ekið verður til Rovinj sem er yndislegur listamannabær við Istríaströndina. Umhverfið er dásamlegt og við njótum þess á skemmtilegri göngu þar sem við förum meðfram ströndinni inn í miðbæ Rovinj sem er litríkur og iðar af mannlífi. Upplagt er að ganga upp að barokkkirkju heilagrar Euphemiu en þaðan er glæsilegt útsýni yfir eyjarnar og gamla bæinn. Úti fyrir Rovinj eru 22 eyjar, stærst þeirra er eyjan Sveta Katharina og sést hún vel frá gamla bænum. Einnig munum við halda niður listamannagötuna og um elsta hluta bæjarins. Á leiðinni þangað verður stoppað fyrir ofan Limski skurðinn. Hann er iðulega talinn vera fallegasti fjörður Króatíu og hefur fegurð hans dregið að sér marga kvikmyndagerðarmenn. Eftir góðan tíma í Rovinj verður ekið til Pazin og borðaður léttur hádegisverður hjá vínbónda en hjá honum er ætíð söngur og gleði.

Slökun og rólegheit eru á dagskrá í dag. Það er upplagt að fara á ströndina, í gönguferð, sund eða rölta meðfram ströndinni, t.d. yfir til Piran. Það er upplagt að vera búin að panta sér tíma í nuddi eða öðru dekri fyrir þá sem það vilja. Í Portorož er urmull veitingastaða og kaffihúsa og þar er meðal annars hægt að smakka á ýmsu góðgæti úr sjónum og réttum með hinum víðfrægu Istría trufflusveppum sem þykja algert lostæti. Einnig er hægt að kíkja inn til kaupmanna og skoða hvað þeir hafa upp á að bjóða. 

Í dag ætlum við til Poreč sem er með elstu bæjunum við ströndina. Euphrasius basilíkan frá 6. öld er einkar athyglisverð en hún fór á heimsminjaskrá UNESCO árið 1997. Einnig eru skemmtilegar marmaralagðar götur og fagrar byggingar sem skreyta borgina. Hér væri hægt að líta á kaupmenn bæjarins en auðvelt er að finna skemmtilegar verslanir, til að mynda mikið af skartgripaverslunum, fá sér hressingu og njóta náttúrufegurðarinnar sem er ólýsanleg á þessum einstaka stað. 

Nú er komið að heimferð eftir þessa glæsilegu og skemmtilegu ferð.
Um morguninn er upplagt að taka því rólega í Portorož en eftir hádegi verður ekið til Pula þar sem tækifæri gefst til að rölta um og fá sér góðan kvöldverð áður en haldið verður á flugvöllinn. Brottför þaðan er kl. 22:30 og áætluð lending í Keflavík kl. 01:10 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

• Hotel Riviera Portorož