Á Inkaslóðum í Perú

Flogið verður frá Lima snemma dags og lent um einum og hálfum tíma síðar í bænum Cusco á hásléttum Andesfjalla. Þaðan liggur leið okkar í átt að hinum Heilaga dal Inkanna, Valle Sagrado. Næst komum við í fagra bæinn Pisac, þar sem rótgróin menning Inka og nýlenduáhrif hafa náð góðu jafnvægi og lifnaðarhættir íbúanna bera þess merki, enda er andrúmsloftið einstakt á þessum stað. Hér er mikil áhersla á hið andlega og trúarlega í menningu Andesfjalla enda þykir staðurinn búa yfir mikilli orku. Íbúarnir stunda margir hverjir hefðbundna akuryrkju, vefnað og leirkeralist. Við kynnumst fornum aðferðum við litun og vefnað og listaverkum úr ull af dýrum sem eiga uppruna sinn í Andesfjöllunum. Þau eru af kameldýraætt, svo sem lama- og alpacadýr, vicuñas og guanacos. Pisac er einnig mikilvægt svæði út frá fornleifum, hér eru rústir frá tímum Inka, fornir akrar, hof og virki. Okkur gefst færi á að kanna bæinn, sem er frægur fyrir markað með listrænt handverk, eins og vefnað, skartgripi, keramik og vefnaðarvöru. Gist í tvær nætur á hóteli í Heilaga dalnum, Valle Sagrado.

• Morgunverður
• Hádegisverður

Í dag skoðum við ýmsa staði í hinum Heilaga dal Inkanna. Fyrsti viðkomustaður okkar eru fornleifarnar í Moray en þær samanstanda af hringlaga syllum sem eru byggðar inn í landslagið. Það eru allt að 30 metar frá botni upp að brún á þeim dýpstu. Mönnum hefur lengi verið ráðgáta í hvaða tilgangi þessi fyrirbæri voru byggð en við heyrum um líklegustu tilgátuna. Við heimsækjum saltnámur í Maras þar sem við kynnum okkur forna hætti og vinnulag Inka, enda hafa þessar námur verið í notkun frá þeirra tíma. Eftir góðan hádegismat heldur leið okkar áfram til Ollantaytambo, eina þorps Inkamenningarinnar sem enn er í byggð, en með því er átt við að íbúarnir eru ennþá að nota það sem Inkarnir byggðu á sínum tíma, skipulag bæjarins hefur haldið sér, áveitukerfi og ræktarsillur. Fyrir ofan þorpið gnæfa rústir stallaðs virkis sem eitt sinn varði borgina og veitti henni vernd gegn óvinum.

• Morgunverður
• Hádegisverður

Dagurinn hefst á lestarferð til Aguas Calientes, sem er við rætur fjallsins sem Machu Picchu stendur á. Strax eftir komuna í bæinn höldum við upp til Machu Picchu, sem stundum hefur verið kallað eitt af sjö undrum veraldar. Borgin er á stórkostlegum fjallstoppi hátt yfir Rio Urubamba-gilinu. Hvöss strýta fjallsins Huayna Picchu gnæfir yfir og allt er umlukið háum fjallgarði sem gjarnan er hulinn þoku. Farið verður með rútu upp að sjálfri Inkaborginni og þaðan haldið í skoðunarferð um rústirnar en þar bjuggu eitt sinn um 15.000 íbúar. Þessi týnda borg, bókstaflega grafin í skógarkjarr, fannst ekki aftur fyrr en árið 1911. Í skoðunarferð um borgina sjáum við hvernig ýmsar gerðir húsa voru byggðar af einstakri nákvæmni. Gistum í eina nótt á hóteli í Aguas Calientes við rætur Machu Picchu.

*Hafa ber í huga að Machu Picchu er staðsett í um 2400 metra hæð og Sólarhliðið í um 2700 metra hæð og þegar svona hátt er komið er minna súrefni í loftinu en á lágsléttu. Þrekið er hugsanlega minna og fólk gæti verið andstyttra en venjulega. Það er mikilvægt að vera vel skóaður og undirbúa sig fyrir ójafna stíga og tröppur til að komast um svæðið. 

• Morgunverður
• Hádegisverður
• Kvöldverður

Í dag skoðum við Sólhliðið, innganginn inn í Machu Picchu fyrir þá sem ferðuðust eftir Inkaslóðanum. Hliðið sjálft á sér mikilvægara hlutverk þar sem því var valin staður þar sem fyrstu geislar sólar brjótast í gegn um vetrarsólstöður. Það var álitið meira en hlið inn í borgina, menn trúðu að það væri dyr inn í vídd sólarguðsins Inti. Héðan er stórkostlegt útsýni yfir Machu Picchu*. Fyrir þá sem kjósa heldur að skoða Machu Picchu nánar þá gefst tækifæri til að skoða ýmis svæði borgarinnar betur og upplifa þennan einstaka stað. Hér eru leyfar af ræktarsyllum, heimilum, verkstæðum og geymslum almúgafólks í borginni, einnig er hægt að sjá hvar Sólarhof guðsins Inti stóð, Heilaga torgið, aðalhof borgarinnar, Hof hinna þriggja glugga og fleira. Eftir góðan tíma í Machu Picchu tökum við svo lestina til baka og verðum komin um kvöldmatarleytið til Cusco þar sem við gistum í tvær nætur.

*Ganga að Sólarhliðinu frá Machu Picchu og til baka tekur um 2 tíma og er um 4 kílómetra löng, upphækkun er um 290 metrar. Leiðin er nokkuð aflíðandi upp í móti en seinustu 15 mínúturnar má búast við meiri bratta. Miðlungserfið ganga. Mikilvægt að hafa vatn meðferðis.

• Morgunverður
• HádegisverðurMachu Picchu, 08680, Perú
  
  

Frjáls tími um morguninn til að hvíla sig og safna kröftum. Eftir hádegi verður farið í skoðunarferð um Cusco og nágrenni. Rétt fyrir utan borgina er steinavirkið Sacsayhuamán en það gengdi stóru trúarlegu hlutverki á sínum tíma, helgað þrumuguðinum Illapa. Við komu Spánverja var það hernaðarlega mikilvægt fyrir Inkana. Aðeins fjær sjáum við völundarhúsið Q’enqo sem einnig er mikilvægt svæði, þar voru færðar fórnir og lík smurð til varðveislu. Hér er steinaltari í formi fjallaljóns, hringleikahús, útskornir steindrangar og net ganga neðanjarðar. Rauða virkið Puca-Pucara hefur líklega verið útvörður Cusco eða athvarf ferðalanga á leið sinni til borgarinnar. Í Tambomachay hefur vatnið verið í hávegum haft enda hefur verið vísað til þessa staðar sem baða Inkanna. Hér eru vatnsveitustokkar út steini, áveitur til að beina vatni með skipulögðum hætti á ræktunarsyllur og haganlega gerðir gosbrunnar. Við skoðum nánar fyrrum höfuðborg Inkaríkisins, Cusco, og þar sjáum við ýmislegt forvitnilegt. Dómkirkjuna á Plaza de Armas torginu, Sólarhofið eða Koricancha einn mikilvægasta stað Inkaríkisins, en St. Domingo-kirkjan var byggð ofan á hana. Korikancha var á sínum tíma skreytt með 18k gulli, sem Spánverjar rændu. Við fáum frjálsan tíma síðdegis en endum síðan frábæran dag á að borða góðan kvöldmat með þjóðlegum skemmtiatriðum.

• Morgunverður
• Kvöldverður

Í dag getur hver og einn skipulagt daginn eftir eigin hentisemi. Upplagt er að taka það rólega og njóta aðstöðu hótelsins. Athygli er vakin á því að hæðaveiki gæti hrjáð mannskapinn og því gott að fara sér hægt. Ef áhugi er fyrir léttri gönguferð þá er hægt að glöggva sig betur á borginni Cusco en hótelið er vel staðsett í gamla bænum. Í Cusco er að finna vandað handverk og frábæra veitingastaði.

• Morgunverður

Í dag er langur ferðadagur. Að loknum morgunverði kveðjum við borgina Cusco og tökum stefnuna á Puno. Á leiðinni heimsækjum við bæinn Andahuaylillas sem stendur í 3.198 m hæð yfir sjávarmáli. Þar er að finna merkilega kirkju frá árinu 1580. Í fyrstu virðist hún einstaklega látlaus en þegar inn er komið blasir við sjón sem minnir á kviksjá. Litrík málverk þekja alla veggi, freskur í loftum og stórbrotið gyllt altari prýðir þessa stórfenglegu kirkju sem hefur verið nefnd sixtínska kapella Andesfjalla. Þegar við höfum skoðað okkur um í þessum fallega bæ höldum við leið okkar áfram um Andesfjöllin. Við fræðumst um og skoðum einstaklega merkar minjar frá tímum Inkanna s.s. hofið Raqchi og borgina Pucará sem talin er vera allt frá árinu 1800 fyrir Krist. Þegar við komum til borgarinnar Puno verður okkur ekið beint á hótel þar sem við gistum í tvær nætur.

• Morgunverður
• Hádegisverður
  
  

Að loknum morgunverði höldum við í ógleymanlega siglingu á hinu töfrandi Titicaca vatni, einu af undrum Perú. Vatnið er það stærsta í Suður-Ameríku og er hæsta skipgenga vatn í heimi, í 3.812 metra hæð. Við stöldrum fyrst við fljótandi eyjarnar Uros og kynnumst menningu Uros þjóðflokksins sem byggir þessar stórmerkilegu eyjar. Eyjarnar eru um 40 talsins og eru búnar til úr um 30-40 sentímetra þunnu sefi og fljóta á vatninu. Við höldum í stutta gönguferð um eyjarnar og kynnumst glaðlegum íbúum og lifnaðarháttum þeirra. Að því loknu verður haldið til Taquile eyju en þar heilsa íbúar Quechua samfélagsins, Taquileños, upp á gesti og gangandi í litríkum þjóðbúningnum og sýna eyjuna með stolti. Þar verður snæddur hádegisverður að hætti heimamanna. Á eyjunni búa um 2.200 manns og hún er sérstaklega þekkt fyrir fallegan og litríkan skrautvefnað kvennanna og prjónaskap karlanna. Þessi einstaka menningararfleið er á heimsminjaskrá UNESCO um menningarverðmæti sem ber að varðveita.

• Morgunverður
• Hádegisverður
  
  

Við hefjum daginn á að heimsækja Sillustani, einstaklega merkileg grafhýsi. Þar sjáum við svonefnda Chullpas turna frá 14. öld sem eru um 90 talsins. Auk þeirra er að finna þar sérstakan fórnarstað, hinn svokallaða Sólarhring, sem er umgirtur kransi úr tilhöggnum steinum. Við göngum í um klukkustund í einstöku landslagi og njótum útsýnisins við Umayo vatn sem tengist þessum stað órjúfanlegum böndum. Skömmu eftir hádegi förum við í flug til Lima og lendum þar um einum og hálfum tíma síðar. Þaðan verður ekið til borgarinnar Paracas þar sem gist verður í tvær nætur. 

• Morgunverður
• Hádegisverður
  
  

Í dag tökum við daginn snemma og höldum í einstaka skoðunarferð til Ballestas eyjanna sem oft eru nefndar litlu Galapagos. Við verðum vitni að einstöku dýralífi eyjanna, fjölskrúðugu fuglalífi og dásamlegu sjónarspili náttúrunnar. Ef verður leyfir höldum við í útsýnisflug yfir eitt af áhugaverðustu fyrirbærum Perú, hinar dularfullu Nazca línur. Hér er um að ræða einstaklega undarlegar en magnaðar myndir sem merktar hafa verið í jarðveginn fyrir um 2.000 árum og hafa enn ekki máðst út. Umfang þeirra er einungis hægt að sjá úr lofti. Síðdegið er frjálst í Paracas.

• Morgunverður
  
  

Fyrir hádegið höldum við í Ica dalinn en þar eru fyrsta flokks skilyrði fyrir vínrækt. Þar er að finna elsta víngerðarhús Perú, Tacama. Rætur þess er að rekja til nýlendutímans en það var spænskur aðalsmaður, Don Juan de la Riva, sem kom því á fót. Hér eru framleidd heimskunn eðalvín þar á meðal Pisco sem er margverðlaunað koníak heimamanna. Við kynnum okkur framleiðsluna og smökkum á afurðunum. Farþegar hafa frjálsan tíma seinni hluta dags til að slaka á á hótelinu sem er vel útbúið og skemmtilega staðsett við Paracas flóann. Einnig er hægt að kynna sér Paracas nánar á eigin vegum.

• Morgunverður
  
  

Eftir morgunmat höldum við af stað til Lima með rútu en reiknað er með að ferðin taki um 4 tíma. Þegar við komum til Lima skráum við okkur aftur inn á sama hótel og í upphafi ferðar og eftirmiðdagurinn er frjáls. Við snæðum saman kveðjukvöldverð á veitingastað í Miraflores hverfi Lima en hann stendur við rústir Huaca Pucllana pýramídans. 

• Morgunverður
• Kvöldverður

Við tökum daginn í dag snemma. Brottför flugs frá Lima til Toronto er kl. 08:00. Lent verður í Toronto kl. 16:55 að staðartíma eftir um 7,5 tíma flug. Ferðin heldur áfram til Íslands sama dag eða kl. 20:50. 

• Morgunverður

Áætluð lending á Íslandi er kl. 06:20 morguninn eftir eða þann 17. október, eftir um 5,5 tíma flug.

Fararstjóri getur fært dagskrárliði á milli daga eftir þörfum þegar komið er á staðinn.