Brasilía & Argentína

Í dag ökum við frá Buenos Aires til bæjarins Tigre þar sem skemmtileg sigling bíður okkar. Á leið okkar út úr Buenos Aires förum við í gegnum glæsileg úthverfi í norðurhluta borgarinnar. Í Tigre stígum við um borð í bát sem siglir með okkur um óshólma Paraná. Paraná fljótið er næstlengsta fljót Suður-Ameríku (á eftir Amazon fljótinu) og er upptök þess að finna í Brasilíu. Hér má sjá hundruð eyja með þéttum hitabeltisgróðri sem eru hluti af einstöku vistkerfi svæðisins. Eftir notalega siglingu ökum við til baka til Buenos Aires þar sem við njótum tangósýningar og kvöldverðar á einu af veitingahúsum borgarinnar.

• Morgunmatur
• Kvöldmatur

Eftir morgunverð á hótelinu liggur leið okkar með ferju eftir ánni Rio de la Plata til eins elsta bæjar í Úrúgvæ, Colonia del Sacramento. Bærinn er á heimsminjaskrá UNESCO en tilheyrði fyrst í stað Spáni en síðar Portúgal og því er byggingarstíll bæjarins undir áhrifum beggja landa. Við förum í skoðunarferð um bæinn og borðum hádegisverð þar. Um eftirmiðdaginn tökum við ferjuna aftur til Buenos Aires.

• Morgunmatur
• Hádegismatur

Í dag er frjáls dagur í Buenos Aires og upplagt að skoða sig betur um í þessari fallegu borg. Áhugasamir geta t.d. heimsótt safn Evu Perón sem geymir margt áhugaverðra muna sem tengjast þessari þekktu kjarnakonu.

• Morgunmatur

Við höldum áfram að njóta lífsins í Buenos Aires á eigin vegum en fararstjórinn er að sjálfsögðu alltaf til taks fyrir hópinn.

• Morgunmatur

Við höldum út á flugvöll um morguninn þaðan sem við fljúgum til Puerto Iguazú. Við heimsækjum Iguazú þjóðgarðinn, Argentínu megin við Iguazú fossanna. Í þjóðgarðinum má sjá  litrík fiðrildi og fugla flögra um á milli stórra trjánna, vínviðarins og burknanna, en öll eru þau hluti af fjölbreyttu gróður- og dýralífi garðsins. Garðurinn varð hluti af heimsminjaskrá UNESCO árið 1984 vegna fegurðar sinnar og líffræðilegs fjölbreytileika. Þjóðgarðinum tilheyra um 200 fossar sem eru allt að 80 metrar á hæð og mynda það sem kallað hefur verið einu nafni Iguazú fossar. Við hefjum heimsóknina í gestastofunni en höldum þaðan í gönguferð um þjóðgarðinn með útsýni yfir stórkostlega fossana. Farið verður með lítilli lest langleiðina upp að Garganta del Diablo eða Gini djöfulsins og gengin um 1 km löng leið eftir göngubrúm út að fossinum þar sem þú upplifir gríðarlegan kraft hans. Hádegisverður snæddur í þjóðgarðinum. Gist á hóteli í Iguazú í tvær nætur.

•  Morgunmatur
•  Hádegismatur

Um morguninn verður farið í skoðunarferð Brasilíu megin þjóðgarðsins. Undursamleg fegurð og fjölbreytt lífríki tekur á móti okkur þegar komið er inn í garðinn og er um að gera að njóta umhverfisins á meðan á göngunni stendur. Þar sem stærsti hluti fossanna er Argentínu megin þjóðgarðsins, þá er einungis einn göngustígur hér, um 1 km langur. Frá honum höfum við stórkostlegt útsýni yfir fossa beggja landa. Við enda göngustígsins er lyfta en úr henni er frábært útsýni yfir brasilíska hluta þjóðgarðsins og Floreano fossinn. Um kvöldið snæðum við saman kvöldverð í Iguazú.

• Morgunmatur
• Kvöldmatur

Fyrri part dagsins eigum við frjálsan tíma í Iguazú en svo verður haldið út á flugvöll og flogið til Rio de Janeiro kl. 18:45. Þessi stórfenglega borg stendur við Atlantshafið á austurströnd Brasilíu og setur iðandi líf og glaðværð íbúanna svip sinn á hana. Borgin státar af fallegri, náttúrulegri höfn, umlukin grænum, skógi vöxnum klettum, stóru hafi og löngum ströndum. Gist verður á hóteli í Rio de Janeiro í fimm nætur.

• Morgunmatur

Eftir morgunverð ökum við í áttina að Corcovado fjalli. Þar er að finna hina frægu Kristsstyttu sem stendur í um 710 metra hæð yfir sjávarmáli og var árið 2007 valin ein af sjö nýju undrum veraldar. Við förum á jeppum upp á fjallið og njótum stórbrotins útsýnis yfir Rio de Janeiro. Seinni part dagsins gefst frjáls tími í Rio de Janeiro.

• Morgunmatur

Í dag skoðum við Sykurtoppinn eða Sugar Loaf Mountain sem er eitt helsta kennileiti Rio de Janeiro. Farið verður með kláfi upp á hina 215 m háu Urca hæð áður en annar kláfur er tekinn upp á Sykurtoppinn sem er í 395 m hæð yfir sjávarmáli. Í heiðskýru veðri er frábært útsýni til allra átta frá Sykurtoppnum en þaðan má sjá stóran hluta Rio de Janeiro, m.a. Copacabana ströndina, Corcovado fjallið og miðbæinn. Eftir ferðina á Sykurtoppinn verður farið í skoðunarferð um borgina og merkustu staðir hennar heimsóttir.

• Morgunmatur
• Hádegismatur

Að loknum morgunverði höldum við í dagsferð til borgarinnar Petrópolis sem einnig er nefnd Keisaraborgin en hún ber nafn síðasta keisara Brasilíu, Pedro II, honum til heiðurs. Borgin var sumardvalarstaður keisara og aristókrata Brasilíu á 19. öld og varð fyrsta höfuðborg Rio de Janeiro fylkisins í sjálfstæðisbaráttu Brasilíu. Hér skoðum
við borgina og fræðumst um sögu hennar og lítum á merkilegar byggingar. Snæðum saman hádegisverð og höldum aftur til Rio þegar við höfum skoðað nægju okkar. Kvöldið er frjálst.

• Morgunmatur
• Hádegismatur

Í dag eigum við frjálsan dag í þessari litríku borg. Hægt er að fara í gönguferð eftir Copacabana eða Ipanema ströndunum, heimsækja eitt af strandkaffihúsum borgarinnar eða kíkja í verslanir. Um kvöldið snæðum við sameiginlegan kveðjukvöldverð í borginni.

•  Morgunmatur
• Kvöldmatur

Nú er runninn upp síðasti dagurinn okkar í Rio. Flogið verður í næturflugi til Frankfurt kl. 16:15 og lent þar kl. 8:35 að staðartíma þann 19. október. Flugið tekur um 11 klukkustundir og 55 mínútur.

• Morgunmatur

Brottför frá Frankfurt kl. 21:50 að staðartíma og áætluð lending í Keflavík kl. 23:35 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.