Hjólað á Grikklandi

Um það bil 250 km norður af Aþenu gengur skagi út í Eyjahafið sem heitir Pelionskaginn. Þessi skagi er einstaklega náttúrufagur þar sem skiptast á fjöll og djúpir dalir. Út um allan skagann eru hjólaleiðir þar sem hjólað er í gegnum trjálundi, akra og á milli þorpa. Náttúrufegurðin á skaganum er stórkostleg og þar eru 68 lítil þorp sem hanga í hlíðunum, umlukin gróðri, en hvergi er langt í hvítu strendurnar við sjóinn. Þarna áttu Kentárarnir sem voru hálfir hestar og hálfir menn heima á goðsögulegum tímum.
Keyrslan frá Aþenu til Pelion tekur u.þ.b. 4 klst. og þar verður dvalið í bænum Portaria í fimm nætur. Þegar hópurinn er búinn að koma sér fyrir á hótelinu kemur gríski hjólaleiðsögumaðurinn og heldur fund með hópnum. Kvöldverður á veitingastað í Portaria.

Nú verður farið með rútu og ekið í um 40 mín. til bæjar við sjóinn sem heitir Kato Gatsea. Þaðan er hjólað til þorpanna Kala Nera og Koropi og frá Koropi er hjólað upp í fjallið á milli ólífulunda, ávaxtatrjáa og akra. Á leiðinni er stoppað og farið í stuttan göngutúr að fossi sem gaman er að sjá. Eftir göngutúrinn er haldið áfram og hjólað til litla þorpsins Afissou þar sem er hægt að setjast niður á fallegu torgi til að fá sér einhverja hressingu. Hjólað til baka eftir sama vegi.

• Tími: u.þ.b. 4 klst. með stoppum
• Vegalengd: u.þ.b. 24 km
• Hækkun: u.þ.b. 200m

Í dag er hjólað upp í fjallið fyrir ofan bæinn Portaria, fram hjá rússnesku klaustri og inn í skóginn sem er í 1300 m hæð. Þaðan er hjólað niður í þorpið Makrinitsa þar sem stoppað er á fallega torginu í miðjum bænum sem oft er kallað verönd Pelion vegna útsýnisins sem þaðan er yfir borgina Volos, flóann og meginlandið. Þorpið er frægt fyrir málverk eftir grískan málara sem er í einu af kaffihúsum bæjarins og einnig fyrir yngingarbrunninn en þeir sem drekka úr þessum brunni verða að eilífu ungir. Frá Makrinitsa er haldið áfram til Portaria þar sem ferðinni lýkur.

• Tími: u.þ.b. 4 klst. með stoppum
• Vegalengd: u.þ.b. 20 km
• Hækkun: u.þ.b. 600 m

Nú verður farið með rútu að sama stað og fyrsta daginn, við þorpið Kala Nera, en þaðan verður hjólað upp í fjallið til þorpsins Milies sem er eitt af frægustu þorpunum í Pelion, þekkt fyrir 15. aldar kirkjuna sem stendur í miðju þorpinu og gömlu lestarstöðina frá 19. öld sem er enn í notkun. Hjólað er áfram í gegnum þorpin Visitsa, Pinakates og Agios Georgios og síðan fer að halla niður á við frá klaustrinu Agia Triada þaðan sem er frábært útsýni yfir Pagasitikoflóann. Túrinn endar í þorpinu Kato Gatsea og þá er hópurinn búinn að sækja heim 8 þorp og 8 torg. Rútan sækir hópinn en stoppar í bænum Volos þar sem borðaður er hádegismatur að hætti Pelionbúa með sjávarrétta smáréttum.

• Tími: u.þ.b. 4 klst. með stoppum
• Vegalengd: u.þ.b. 28 km
• Hækkun: u.þ.b. 800 m

Eftir morgunmat er haldið af stað á hjólunum frá hótelinu í Portaria eftir malbikuðum vegi upp í 1200 m hæð að skíðasvæðinu í Hania. Þaðan liggur vegurinn niður á við á malarvegi til þorpsins Zagora en frá ávaxtaökrunum þar í kring koma bestu og þekktustu epli Grikklands sem seld eru út um allan heim, þ.á m. til Íslands. Það er stoppað í stutta stund á torginu og síðan er hjólað áfram niður á strönd að þorpinu Chorefto þar sem er sérlega falleg strönd. Áður en haldið er af stað heim með rútunni er upplagt að fá sér sundsprett í tærum sjónum.

• Tími: u.þ.b. 5-6 klst. með stoppum
• Vegalengd: u.þ.b. 35 km
• Hækkun: u.þ.b. 700 m

Í dag kveðjum við Pelionskagann og næsta ævintýri hefst á Mamma Mia eyjunni Skopelos. Þangað er siglt frá Volos snemma morguns og siglingin tekur u.þ.b. 3 klst. Þegar komið er til Skopelos bíður rúta á höfninni sem fer með hópinn á hótel í bænum þar sem dvalið verður í þrjár nætur. Skopelos er lítil eyja sem tilheyrir Skrefeyjunum og er mikil paradís með blágrænum sjó og þéttum grænum furuskógi. Sagan segir að Stafylos (sem þýðir vínber á grísku) sonur Dyonisus og Ariadne hafi stofnað fyrstu borgina á eyjunni og það var kannski þess vegna sem vínið frá eyjunni var frægt um allt Miðjarðarhaf til forna. Á eyjunni eru dásamlegar strendur og sjórinn er ótrúlega tær. Bærinn á Skopelos er lítill og sjarmerandi í þeim gríska stíl sem tilheyrir Skrefeyjunum. Í dag er Skopelos fræg fyrir það að kvikmyndin Mamma Mia var að mestu leyti tekin upp á hinum ýmsu stöðum á eyjunni. Liðsmenn hljómsveitarinnar Abba höfðu lengi verið hrifnir af Skrefeyjunum og koma enn á hverju ári í sumarleyfi til Grikklands. Hin fræga sena þegar allir eru að fara í brúðkaupið var kvikmynduð á klettinum sem ber nafnið Agios Ioannis. Stjörnur myndarinnar dvöldu einnig lengi á eyjunni og sumar þeirra hafa heimsótt hana aftur og aftur. Í eftirmiðdaginn býður fararstjóri upp á göngutúr um bæinn og og upp í virkið sem er fyrir ofan hann. Göngutúrinn endar á kvöldverði á veitingahúsi við höfnina.

Frjáls dagur en um kvöldið geta þeir sem það vilja farið í hjólatúr sem byrjar í miðbænum kl. 19.00. Hjólað verður út fyrir bæinn á fallega útsýnisstaði, stoppað til að horfa á sólarlagið og njóta náttúrunnar og hlýs haustkvöldsins.

• Tími: u.þ.b. 3 klst.

Morguninn verður tekinn rólega en í eftirmiðdaginn er keyrt til klettarins Agios Jannis þar sem brúðkaupssenan í Mamma Mia var kvikmynduð. Það er um að gera að ganga upp í litlu kirkjuna á klettinum en síðan verður ekið til bæjarins Glossa þar sem borðaður er kvöldverður á glæsilegum veitingastað með frábæru útsýni.

Upp úr hádegi er lagt af stað frá Skopelos og siglt yfir til Mantoudi á eyjunni Eviu og þaðan er keyrt til Aþenu þar sem dvalið verður í tvær nætur. Kvöldið er frjálst til að rölta um Aþenu á eigin vegum.

Eftir morgunverð er haldið af stað með rútu í skoðunarferð um Aþenu þar sem stoppað er til að sjá skiptingu varðanna fyrir framan gömlu konungshöllina og hjá leikvangnum Kallimarmaro sem var byggður fyrir fyrstu Ólympíuleika okkar tíma árið 1896. Við sjáum einnig nýklassísku háskólabyggingarnar, hof Seifs og hlið Hadríans. Eftir hringferðina um Aþenu förum við úr rútunni við Akrópólishæðina og göngum upp á Akrópólis til að skoða hofin þrjú sem þar eru, en af þeim er Meyjarhofið frægast. Þegar við komum niður af hæðinni göngum við inn í Plakahverfið þar sem við borðum hádegismat. Eftirmiðdagurinn og kvöldið er frjálst.

Nú er komið að ferðalokum eftir yndislega daga í Grikklandi. Snemma morguns verður ekið út á flugvöll og er brottför frá Aþenu kl. 10.20. Lending á Íslandi kl. 13:20 að staðartíma.