Ganga & jóga í Toskana

Eftir morgunverð hefjum við gönguna okkar í miðaldabænum Radda sem stendur í hjarta Chianti héraðsins í Toskana. Bærinn er staðsettur á hæð, milli dalanna Arabia og Pesa. Þar er víðsýnt yfir grónar hæðirnar um kring þar sem skiptast á vínekrur, ólífulundir og vegaslóðar lagðir háum sýprusviði. Leið okkar liggur um Chianti classico vínræktarsvæðið. Við förum yfir ánna Pesa, framhjá Santa Maria Novella kirkjunni sem er ein sú elsta á svæðinu en heimildir eru um hana allt aftur til 10. aldar. Við komum í fallega þorpið Volpaia en virki var reist umhverfis þorpið á 11. öld til að efla varnir þess og hafa steinveggirnir, varðturnarnir og kirkjurnar frá þessum tíma varðveist einstaklega vel. Það er skemmtileg upplifun að ganga eftir mjóum steinilögðum götunum í þessum rólega bæ í fallegu umhverfi og njóta líðandi stundar. Við röltum áfram niður hæðirnar í átt að Radda þaðan sem rútan flytur okkur aftur til baka á hótelið. Seinni hluta dags förum við á skemmtilegt matreiðslunámskeið innan hótelsins þar sem við kynnumst galdrinum við að útúa ekta ítalsk brauð, pasta og tiramisú. Við lærum að elda eins og sannir Toskanabúar með því að nota hágæða hráefni og nota hendurnar sem framlengingu á hjartanu. Við gæðum okkur síðan á kræsingunum í lok námskeiðsins.

• Göngutími: u.þ.b. 3,5 klst.
•  Vegalengd 10 km
• Hækkun/lækkun: u.þ.b. 400 m
• Erfiðleikastig: létt til miðlungs

Við hefjum göngu dagsins á Vecchio brúnni sem er eitt helsta kennileiti Flórens. Brúin liggur milli borgarhluta yfir Arno ánna og var byggð á 14. öld. Eftir endilangri brúnni eru verslanir, fyrst voru þar kjötkaupmenn en á tímum Medici fjölskyldunnar, sem var ein valdamesta fjölskylda Ítalíu og Evrópu á 16. öld, urðu það kaupmenn sem versluðu með eðalsteina, gull og annað skart. Hinum megin við brúna tekur eitt elsta hverfi borgarinnar við, San Niccoló. Hér eru þröngar götur og sund sem minna um margt á miðaldaþorpin sem finnast í sveitum Toskana og hér eru margar fallegar sérverslanir handverks- og listamanna. Við göngum upp bröttu götuna Cosa San Giorgio en þar bjó meðal annars heimspekingurinn, stjörnufræðingurinn og stærðfræðingurinn Galileó. Ef vel er að gáð er húsið hans merkt svo það er hægt að virða það fyrir sér. Við komum upp að Belvedere virkinu en þaðan er stórkostlegt útsýni yfir borgina og sveitir Toskana héraðs. Við fylgjum áfram hinum forna borgarmúr og göngum því næst í gegnum rósagarðinn fræga, Giardino delle Rose, sem er einn friðsælasti staður borgarinnar. Þaðan komum við á torgið Piazzale Michelangelo sem er gríðarstórt og þaðan er víðsýnt yfir alla borgina. Við endum gönguna okkar við turninn, Torre di San Niccoló. Þar er gaman að skoða í fallegar verslanir eða kíkja á veitinga- eða kaffihús.

• Göngutími: u.þ.b. 3 klst.
• Vegalengd 6-7 km
• Hækkun/lækkun: u.þ.b. 150 m
• Erfiðleikastig: létt til miðlungs

Í dag er frjáls dagur sem hægt er að nýta í slökun, göngu eða til að njóta friðsældarinnar í hótelgarðinum í ítalskri sveit. Einnig er hægt að bregða sér til Siena en þangað er hægt að ferðast með leigubíl eða rútu sem gengur á milli hótelsins og miðbæjar Siena. Ferðin tekur um 25 mínútur. 

Í dag kynnumst við Via Francigena sem var ein mikilvægasta pílagrímsleiðin á miðöldum og teygði sig frá Kantarborg í Englandi suður til Rómar. Við höldum af stað áleiðis í átt að bænum Colle Val d´Elsa. Við ferðumst eftir malarvegum og sveitagötum um fornar slóðir Franka þar sem erkibiskup Kantaraborgar fór um á leið sinni til Rómar árið 990. Einn vinsælasti hluti þessara leiðar liggur í gegnum Toskana. Við komum í þorpið San Gimignano en það er á heimsminjaskrá UNESCO. Það er víðfrægt fyrir sitt ágæta hvítvín, Vernaccia di San Gimignano, sem hefur verið framleitt síðan á 13 öld. Við smökkum á afurðum svæðisins á ferðalagi okkar um vínekrurnar fyrir utan þorpið. Í San Gimignano hefur byggingarlist miðalda varðveist og þekktustu byggingarnar eru turnar sem byggðir voru af auðugum fjölskyldum á miðöldum til að þær gætu sýnt veldi sitt. Upprunlega voru turnanir 72 en þeir sem eftir standa setja mikinn svip á þorpið, enda er það stundum kallað Manhattan miðalda.

• Göngutími: u.þ.b. 4 klst.
• Vegalengd 12 km
• Hækkun/lækkun: u.þ.b. 400 m
• Erfiðleikastig: miðlungs

Í dag njótum við þess að ganga um mjóar og fallegar göturnar í völdunarhúsi Siena. Við hefjum ferð okkar við Branda brunninn en hann er einn elsti og stærsti af brunnunum sem reistir voru á miðöldum. Það er oft talað um Siena sem borg Palio en Palio er víðfrægt kapphlaup á hestum sem fer fram umhverfis Piazza del Campo, aðaltorg borgarinnar. Í hlaupinu keppa aðilar úr mismunandi borgarhlutum sem eru sautján talsins og kallast kontrötur (contrada). Hver kontrata hefur sitt sérkenni og sögu, sinn eigin einkennislit, dýr og kirkju og innan hverrar þeirra ríkja ákveðnar hefðir. Eftir sigurinn eru langvinn hátíðahöld í borgarhluta sigurvegarans. Það er gaman að labba um borgina og sjá flöggin breytast eftir því í hvaða hluta maður er staddur en þau standa árið um kring og gefa borginni sérstæðan svip og sjarma. Við Campo torgið stendur einn fallegasti brunnur borgarinnar, Fonte Gaia, en hann var reistur á 15. öld. Á ferð okkar um borgina njótum við á einum tímapunkti leiðsagnar Contradaioli en það er aðili sem er fulltrúi sinnar kontrötu og gegnir menningar- og samfélagslegu hlutverki í því að viðhalda siðvenjum hverrar kontrötu fyrir sig. Viðkomandi fer með okkur á safn og í kirkju í sínum hluta og fræðir okkur um leyndardóma Palio hlaupsins.

• Göngutími: u.þ.b. 3 klst.
•  Vegalengd 12 km
• Hækkun/lækkun: u.þ.b. 300 m
• Erfiðleikastig: létt - miðlungs

Í dag göngum við létta göngu í skóglendi að Sant´Antimo klaustrinu með útsýni í Val d‘Orcia dalinn og Amiata fjöllin. Við endum gönguna okkar við klaustrið en ferðumst síðan með rútu til bæjarins Montalcino þar sem brögðum á viðfræga rauðvíninu þeirra, Brunello di Montalcino, sem er þykir eitt það besta á Ítalíu.

•  Göngutími: u.þ.b. 2,5 klst.
• Vegalengd 7,5 km
• Hækkun/lækkun: u.þ.b. 50 m
• Erfiðleikastig: létt

Nú er komið að heimferð eftir dásamlega daga í sveitasælu Toskana héraðs. Við leggjum snemma af stað til Rómar þaðan sem flogið verður heim kl. 15:25. Lending á Íslandi kl. 18:15 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Gist verður allar næturnar á Certosa di Pontignano sveitahótelinu í hjarta Chianti hérðaðs. Hótelið stendur í hæðunum fyrir ofan Siena nokkrum kílómetrum frá borginni. Hægt er að taka leigubíl eða strætisvagn frá hótelinu til Siena, ferðin tekur 20-25 mínútur. Á hótelinu er veitingastaður og bar, stór og fallegur garður þar sem nægt pláss er til að stunda jóga og hugleiðslu og nokkur almenn rými þar sem hægt er að setjast og hafa það náðugt. Í hverju herbergi er baðherbergi með sturtu eða baði, sjónvarp, sími, öryggishólf, míníbar, hárþurrka og Wi-Fi tenging.