Gengið um vatnahérað Norður-Englands

Fyrsti göngudagurinn okkar hefst með rútuferð til bæjarins Bowness sem stendur við Windermere vatnið og er einn vinsælasti áfangastaðurinn í Vatnahéraðinu. Windermere er stærsta náttúrulega stöðuvatn Englands og á því eru 18 eyjar. Við stoppum við útjaðar Bowness þar sem hópurinn gengur af stað í gegnum huggulegan bæinn og upp á hæð þar sem er fallegt útsýni yfir vatnið. Við höldum áfram skemmtilega leið að vatninu. Á ferð okkar sjást hin ýmsu kennileiti sem eiga sér norrænar rætur svo sem Brantfell og Orrest Head

Eftir góðan morgunverð er ferð okkar heitið að Hadríanusarmúrnum sem stendur nálægt mörkum Englands og Skotlands. Hann er um 117 km að lengd og var á sínum tíma um 4 og hálfur metri á hæð. Við göngum meðfram múrnum sem var byggður af Rómverjum á 2. öld, meðal annars til að verjast árásum Pikta eða Skota og annarra þjóðflokka frá Skotlandi. Múrinn var einnig ætlaður til að stjórna fólksflutningum og verslun og marka nyrsta hluta rómversks landsvæðis á Bretlandi. Mannvirkið er á heimsminjaskrá UNESCO og enn má sjá leyfar af virkjum, smáturnum og hofum en uppgröftur fornleifa á svæðinu hefur gefið innsýn í umsvif Rómverja á Bretlandi, líf hermanna, byggingartækni þess tíma og hvernig samskiptum Rómverja var háttað við heimamenn. Við hefjum gönguna við Housteads gestastofuna og göngum framhjá virkisrústum frá tímum Rómverja. Við sjáum tré Hróa hattar og förum gegnum Sycamore skarðið þar sem elsti garðahlynur Bretlands stóð þar til árið 2023 en felling hans og skemmdir á veggnum var álitið mikið skemmdarverk og varð fréttaefni víða um heim. Við komum síðan að Steel Ridge og förum svo til baka að til Housteads eftir gömlum hermannavegi.

Nú verður genginn skemmtilegur hringur sem hefst við Crooklands hótelið og fylgir Crooklands skipaskurðinum. Hann er hluti af stærri skipaskurði, Lancaster, sem var grafinn á 18. öld og var aðalflutningsæðin frá svæðinu, meðal annars fyrir kol og kalkstein til útflutnings. Fuglalífið við skurðinn er mjög fjölbreytilegt og söngur er víða í lofti. Enn má sjá leyfar bygginga sem reistar voru við skurðinn, t.d. vöruhús, myllur og bryggjur, sumar þessara bygginga hafa öðlast nýtt hlutverk og eru enn í notkun. Við göngum meðfram Peasey gilinu en vatnið sem þar flæðir kemur frá Lambrigg Fell sem liggur norðan við Crookslands. Við gilið má sjá rústir púðurverksmiðju en afurðir hennar voru mikilvægar fyrir námugröft, grjótnám og hernað. Við göngum meðal annars í gegnum litlu þorpin Endmor og Stainton og njótum fallegs útsýnis af hæðunum í kring.

Í dag er ferðinni heitið til Lancaster. Þar hittum við Landrover sérfræðinginn og Íslandsvininn Emrys Kirby og skoðum Landroversafn hans og verkstæði. Hann var aðeins 2 ára gamall þegar hann ferðaðist með fjölskyldu sinni á Landrover um hálendi Íslands. Eftir heimsóknina förum við í stutta göngu um Lancaster, síðan er frjáls tími til að skoða sig um, hér er úrval verslana, kaffihúsa og veitingastaða. Hægt er að kíkja á söfn, skoða Lancaster kastala og önnur kennileiti eða fara í siglingu á skipaskurði svo fátt eitt sé nefnt.

Í dag ökum við til strandbæjarins Blackpool á norðvesturströnd Englands. Hann var eitt sinn agnarlítið þorp en tók að vaxa um miðja 18. öldina þegar sjóböð til heilsubóta komust í tísku, þá varð hann einn vinsælasti strandbær landsins. Frá miðbæ Blackpool göngum við eftir Fylde ströndinni til miðbæjar Fleetwood en þaðan er frábært útsýni út á Írlandshafið. Fleetwood er einn af fáum bæjum á Bretlandi sem var skipulagður frá grunni og þar er að sjá mörg hús í viktorískum stíl. Hér var eitt sinn ein mikilvægasta fiskihöfn landsins.

Í dag förum við í skemmtilega siglingu á næststærsta stöðuvatninu í Vatnahéraði Englands, Ullswater. Það er rómað fyrir náttúrufegurð og friðsæld. Ullswater myndaðist út frá skriðjökli á ísöld og í kring um það eru fallegar aflíðandi hlíðar, gróðursælir dalir, skóglendi og falleg fjallasýn. Á leið okkar til baka verður staldrað við í tveimur af fallegustu þorpum Vatnahérðasþjóðgarðsins, Hawkshead og Grasmere.

Nú er komið að heimferð eftir viðburðarríka daga. Við keyrum á flugvöllinn í Manchester. Brottför með Icelandair er kl. 13:05 og er áætluð lending í Keflavík kl. 14:50 að staðartíma.