Páskaganga við Amalfíströndina

14. - 21. apríl 2025 (8 dagar)

Amalfíströndin er er þekkt fyrir sitt dramatíska landslag, snarbratta kletta í sjó fram, fallegar steinvölustrendur, falda hella og tignarleg fjöll sem gnæfa yfir ásamt stölluðum hlíðum fylltum sítrónutrjám, vínekrum og ólífulundum. Hér eru líka gullfalleg þorp við klettótta sjávarsíðuna og upp eftir hömrunum. Í þessari yndislegu ferð njótum við þess að feta í fótspor guðanna á göngu um Amalfíströndina og næsta nágrenni. Stórkostlegt útsýni er frá gönguleiðunum í þessari ferð yfir hinn dásamlega Napólíflóa sem er einn sá fallegasti á Ítalíu. Við dveljum í bænum Sorrento og njótum þar útivistar og lífsins lystisemda. Við skoðum friðlandið á Punta Campanella höfðanum en þar er fallega eyjan Caprí skammt undan landi. Það býðst að fara í dagsferð til Pompei þar sem finna má eina af frægustu fornminjum veraldar sem voru huldar sýnum í yfir 1500 ár. Við göngum stíg Guðanna milli Bomerano og Nocella og komum við í rómantíska bænum Positano. Við siglum að sjálfsögðu til yndislegu eyjarinnar Caprí þar sem við göngum að fallegasta hluta hennar með útsýni yfir Faraglioni drangana. Við njótum þess að vera í núinu í hjarta Caprí, á Piazzetta torginu þar sem allt iðar af lífi. Við kynnumst einnig ítalskri matargerðarlist þar sem við fáum heimamenn til að kenna okkur að matreiða hina einu sönnu ítölsku pizzu sem upprunnin er frá svæðinu. Í þessari dásamlegu gönguferð njótum við hins ítalska Dolce vita sem og mikilfenglegs útsýnis yfir Napólíflóann og náttúrunnar þar um kring.

Verð á mann 379.900 kr.

Aukagjald fyrir einbýli 50.600 kr.


Innifalið

  • 8 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgun- og kvöldverðir allan tímann á hóteli.
  • Akstur í gönguferðum þar sem við á.
  • Léttur hádegisverður á bóndabýli í Punta Campanella.
  • Sigling til Caprí.
  • Pizza námskeið og hádegisverður í Sorrento. 
  • Göngudagskrá í 5 daga.
  • Leiðsögn staðarleiðsögumanns í gönguferðum.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Kláfar eða stólalyftur upp á fjöll. 
  • Vínsmökkun
  • Hádegisverðir.
  • Þjórfé.
  • Ferða- og forfallatryggingar.

Valfrjálst

  • Aðgangur að fornminjum í Pompei ásamt 2ja tíma leiðsögn u.þ.b. € 70. 

Kort af ferðinni

FerðalýsingPrenta ferðalýsingu

Undirbúningur

Mikilvægt er að þátttakendur séu í góðu gönguformi en besti undirbúningurinn er að ganga reglulega á fjöll. Fyrir þá sem búa á höfuðborgarsvæðinu er gott að fara t.d. reglulega upp að Steini í Esjunni. Þeir sem búa fjær velja sér sitt staðarfjall til að ganga á og sameina þar með undirbúning og útiveru. Því fylgir mikil ánægja að æfa fyrir gönguferð af þessu tagi og farþegar njóta sjálfrar ferðarinnar miklu betur ef þeir æfa og undirbúa sig vel fyrir ferðina. Vinsamlegast athugið að ef þátttakendur hafa ekki þá getu sem nauðsynleg er fyrir göngur ferðarinnar getur fararstjórinn farið fram á að viðkomandi sleppi einhverjum degi/dögum. Í staðinn er hægt að nýta sér aðstöðu hótelsins eða fara í léttar gönguferðir á eigin vegum.

14. apríl | Flug til Rómar & Sorrento

Brottför frá Keflavík kl. 07:50, mæting í Leifsstöð í síðasta lagi 2,5 klst. fyrir brottför. Lending í Róm kl. 14:35 að staðartíma. Við keyrum sem leið liggur til Sorrento við Napólíflóa. Gist verður í sjö nætur, á vel staðsettu hóteli með fallegu útsýni yfir einn fallegasta flóa landsins. Sorrento er hrífandi bær í bröttum hlíðum en þar vaxa ólífu-, appelsínu- og sítrónutré og þess má geta að Limoncello líkjörinn frægi kemur frá þessu svæði.

15. apríl | Ganga eftir Sírenustígnum

Í dag göngum við fallega leið eftir hluta úr einni þekktustu gönguleið á Ítalíu, Sírenustígurinn en hann ber nafn sitt vegna hrífandi útsýnis yfir Li Galli eyjaklasann og Tyrrenahafið. Sírenurnar úr Grískri goðafræði eru sagðar hafa búið þar og seytt þaðan til sín sæfarendur með söng sínum út í opinn dauðann. Frá þessari gönguleið er stórkostlegt útsýni yfir Amalfí ströndina, hafið, stallaðar vínekrurnar fyrir neðan, klettana sem ná niður að sjó og eyjarnar úti fyrir ströndinni. Við göngum um þennan syðri hluta Sorrento skagans innan um miðjarðarhafsgróður, dali og kletta og njótum einstaks útsýnis á þessari fallegu leið.

  • Göngutími: u.þ.b. 3 klst.
  • Hækkun 300 metrar
  • Miðlungs erfið ganga.
Opna allt

16. apríl | Friðlandið Punta Campanella

Í dag höldum við út að Punta Campanella höfðanum sem skilur að Napólí- og Sorrentoflóa. Við göngum með staðarleiðsögumanni um höfðann, sem er friðland bæði á landi sem láði í kring, en þar er einstak vistkerfi og dýrmæt arfleið sem heimamenn vilja vernda. Þar gefur að líta fjöbreyttan miðjarðarhafsgróður, fuglalíf, rómanskar og grískar mannvistarleyfar og rústir, meðal annars hof Mínervu. Leitast er við að skilja eftir sem minnst spor í umhverfinu, það er t.d. hægt að kafa og snorkla í fagurgrænum sjónum úti fyrir höfðanum en veiðar og bátasiglingar eru í algeru lágmarki. Héðan er gott útsýni til eyjunnar Caprí og á góðum degi sést vogskorin strönd hennar, Faraglioni drangarnir og hæsti tindurinn Monte Solaro. Við snæðum léttan hádegisverð á bóndabýli sem býður upp á glæsilegt útsýni og þar gæðum við okkur á hráefni af svæðinu, bæði í mat og drykk.

  • Göngutími: u.þ.b. 3,5 klst.
  • Hækkum 300 m
  • Miðlungs erfið ganga

17. apríl | Fornminjar í Pompei og frjáls dagur

Í dag gefst þeim sem vilja tækifæri á að kynnast Pompei þar sem við skoðum einhverjar frægustu fornminjar veraldar. Borgin fraus í tíma árið 79 og fannst ekki fyrr en seint á 16. öld þegar arkitektinn Domenico Fontana var að grafa fyrir áveituskurði á þessum slóðum. Þá litu dagsins ljós veggskreytingar, áletranir, súlur og aðrar útlínur bygginga frá þessari gleymdu borg. Rústir gömlu Pompei borgar eru eitt merkilegasta dæmi um fornleifauppgröft heillar byggðar og við fræðumst um sögu svæðisins. Fyrir þá sem það kjósa frekar er hægt að nota daginn til afslöppunar í Sorrento. Upplagt er að nota aðstöðuna við hótelið eða fara niður að bátahöfninni en þar er úrval góðra veitingastaða. Einnig er hægt að fara á fallegu baðströndina og fá sér sundsprett. Það er skemmtilegt að upplifa þennan líflega bæ og hinar gróðursælu ólífu-, appelsínu-, og sítrónuhæðir fyrir ofan hann með því að taka litla lest sem gengur þangað. Einnig er tilvalið að kíkja í verslanir og á kaffi- og veitingahús. Upplagt er að smakka eitthvað af réttum svæðisins, svo sem caprí salat, Ravioli Capresi eða Spaghetti alle Vongole.

18. apríl | Stígur Guðanna og Positano

Framundan er spennandi dagur þar sem við þræðum stíg Guðanna milli Bomerano og Nocella, sem er draumur hvers göngumanns. Við gefum okkur tíma til að dást að útsýninu og fá okkur nestisbita. Við göngum niður til Positano, eins rómantískasta og vinsælasta ferðamannabæjar Amalfístrandarinnar. Sagan segir að sjávarguðinn Pósedon hafi stofnað bæinn handa dísinni Pasiteu, og skildi engan undra, staðsetningin er mikilfengleg. Positano stendur á háum kletti þar sem húsin liðast niður eftir klettaveggnum að grænblárri ströndinni. Þar eru heillandi litlar götur og stígar þar sem finna má margar fallegar smáverslanir, veitingastaði, kaffihús og listagallerí. Byggingarnar eru í litríkum pasteltónum, gular, bleikar og appelsínugular og eru gjarnan skreyttar með fallegum plöntum, einkum Þríburablómi sem er þyrnótt klifurjurt með litríkum blómum, sem setur svip sinn á umhverfið. 

  • Göngutími: u.þ.b. 4 klst.
  • Hækkun 350 m
  • Miðlungs til krefjandi ganga

19. apríl | Sigling til perlunnar Caprí

Nú höldum við í bátsferð til Caprí, perlu Napólíflóans. Þar göngum við að einum fallegasta hluta eyjunnar þar sem gefur að líta einstakt útsýni yfir Faraglioni drangana. Við gefum okkur einnig tíma til að staldra við í hjarta eyjunnar, á Piazzetta, eða Umberti torginu sem er miðja alls á þessari eyju og stendur skammt frá höfninni, Marina Grande. Hér er margt um manninn og hér koma heimamenn og ferðalangar til að sýna sig og sjá aðra. Hér líflegt andrúmsloft í fallegu umhverfi og innan um tígulegar byggingar er úrval glæsilegra veitingastaða og kaffihúsa.

  • Göngutími: u.þ.b. 3,5 klst.
  • Hækkun 250 m
  • Auðveld til miðlungs erfið ganga

20. apríl | Matargerðarlist og ganga í Sorrento

Hvern dreymir ekki um að geta útbúið ekta pizzu að hætti íbúa við Napolíflóa? Í dag erum við leidd í sannleikann um galdurinn á bak við einn vinsælasta rétt vesturheims og fáum að spreyta okkur í pizzubakstri með heimamönnum. Við njótum þess að ganga upp grónar hlíðar frá litla þorpinu Sant´Agata og gefum okkur síðan tíma til að staldra við, fá kennslu í pizzagerðalistinni og bragða á afurðinni um hádegisbil. Við höldum síðan
áfram göngu okkar með stórbrotið útsýni Sorrentoflóans allt um kring og endum í Sorrento.

  • Göngutími: u.þ.b. 3,5 klst.
  • Hækkun 380 m
  • Miðlungs erfið ganga

21. apríl | Heimflug frá Róm

Nú er komið að heimferð eftir glæsilega og viðburðaríka ferð. Við tökum daginn snemma og ökum aftur til Rómar. Brottför er þaðan kl. 15:45. Áætluð lending í Keflavík kl. 18:35 að staðartíma.
Fararstjóri getur fært dagskrárliði á milli daga eftir þörfum þegar komið er á staðinn.

Hótel

  • 7 nætur - Sorrento - Art Hotel Gran Paradiso

Myndir úr ferðinni

Fararstjórn

Ósk Vilhjálmsdóttir

Ósk Vilhjálmsdóttir nam myndlist við Hochschule der Künste í Berlín og hefur sinnt leiðsögn frá árinu 1992 meðfram myndlist og kennslu. Lengst af um náttúru Íslands og yfirleitt með franska og þýska ferðamenn. Árin 2003-2006 skipulagði hún ásamt Ástu Arnardóttur leiðangra um náttúrusvæði norðan Vatnajökuls. Í kjölfarið stofnaði hún eigin ferðaskrifstofu með náttúruvernd og slow-travel hugmyndafræði að leiðarljósi. Hún kom meðal annars á laggirnar námskeiðum fyrir börn og unglinga sem fjalla um náttúruskoðun og myndlist, árlegar ferðir um Þjórsárver o.fl. Undanfarinn áratug hefur hún auk þess skipulagt ferðir og námskeið fyrir Íslendinga í Marokkó, Þýskalandi og á Ítalíu. Nú hefur Ósk gengið til liðs við Bændaferðir og hlakkar til samstarfsins.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Póstlisti

Skrá á póstlista