Kvennagleði í Torremolinos

Í dag sækjum við heim einn fallegasta bæinn í Andalúsíu, Ronda, en þar búa um 37.000 manns. Bæjarstæðið er einstakt þar sem bærinn stendur á gilbrúnum Guadelvin árinnar, hér mætast stórbrotið landslag, saga og kjarni spænskrar menningar. Yfir gilið liggur hin fallega brú, Puente Nuevo, en hún tengir saman eldri og yngri hluta bæjarins. Beggja vegna brúarinnar er dásamlegt útsýni yfir bæinn, djúpt gilið og dalinn fyrir neðan. Gamli bærinn, La Ciudad, er fylltur mjóum steinilögðum götum með fallegum torgum og byggingum. Í Ronda voru háðir miklir bardagar í spænsku borgarastyrjöldinni 1936-1939 og einnig er frægt atriði í skáldsögu Ernest Hemingways, Hverjum klukkan glymur, sagt vera innblásið af raunverulegum atburðum héðan. Ronda er þekkt sem upphafsstaður nútíma nautaats og þar er að finna einn elsta nautaatsvöll Spánar, Plaza de Toros. Eftir skoðunarferð ætlum við að kynna okkur vínframleiðslu á svæðinu og fá að smakka á afurðum heimamanna ásamt léttum hádegisverði.

Hvíta fjallaþorpið Frigiliana við rætur Sierra Almijara fjallanna hefur nokkrum sinnum verið verðlaunað sem fallegasta þorp Andalúsíu enda umlykur náttúrufegurð Málaga héraðs þorpið. Sögulegi miðbærinn er sjarmerandi með sínum glitrandi hvítu húsum sem lýsa undir Miðjarðarhafssólinni. Eitt aðdráttarafl bæjarins er Mára hverfið, Barrio Morisco, sem er það fallegasta á þessu svæði og svo gamli bærinn með fallegum gosbrunnum, minnisvörðum, kirkjum og litríkum litlum kaffihúsum og veitingastöðum. Við ætlum að njóta þess að vera á þessum fallega stað og skoða okkur um. Upplagt að fá sér hressingu og líta inn í skemmtilegar litlar verslanir. Endum daginn á heimsókn til ólífuolíubónda þar sem gaman er að smakka á afurðunum.

Hin vinsæla suður spænska borg Marbella höfðar til næstum allra með fjölbreyttum náttúrutöfrum sínum, fallegri strandlengju, lystisnekkjuhöfn og fjallafegurð. Virkar eins og friðsælt sjávarþorp með sínum eigin sjarma og glitrandi hvítu byggingum. Fjölmargir listamenn og virkilega vel stætt fólk frá öllum heimshornum laðast eins og segull að borginni á hverju ári og orðatiltækið „Marbella er hreinn lífsstíll“ hefur orðið til. Borgin á sína sögu og yfirbragð sem er skemmtilegt að upplifa í völundarhúsi gamla bæjarins með sínum sögulegu byggingum og dæmigerðu litlu veitingahúsum þar sem boðið er upp á tapas og aðra staðbundna rétti. Hér gefum við okkur góðan tíma til að njóta og kanna líf bæjarbúa sem er fjölbreytilegt og litríkt. Upplagt er að fá sér hressingu áður en ekið verður til baka.

Við höldum áfram að njóta okkar í Torremolinos og nú er frjáls tími. Upplagt er að skoða La Carihuela hverfið þar sem miðbærinn er. Það er í suðvestari enda bæjarins og íbúar þar lifðu mikið á sjávarnytjum á árum áður. Í dag eru hér bestu sjávarréttarstaðirnir í Torremolinos og víða eru skemmtilegar litlar götur með hvítkölkuðum húsum sem eru blómum skrýdd. Hér ríkir afslappað andrúmsloft. Fyrir þá sem vilja er gaman að fara í gönguferð, kíkja í verslanir eða fá sér tapasrétti á einum af fjölmörgum stöðum bæjarins.

Nú er komið að heimferð eftir glæsilega og skemmtilega ferð. Sameiginlegur kvöldverður í Torremolinos kl 17:00. Því næst verður ekið út á flugvöll í Málaga og er brottför þaðan kl. 22:40 og lending í Keflavík kl. 01:30 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Hotel Melia Costa de Sol