Ljósadýrð á Rín

Í þessari merku borg er margt að sjá og upplagt að nota daginn til þess að skoða hana nánar. Hér eru leyfar af rómverskum böðum og hringleikahúsi, einnig elsta dómkirkja Þýskalands og basilika frá 4. öld en þar er stærsti salur sem varðveist hefur frá fornöld. Við hlið basilikunnar stendur hin fallega og bleiklitaða Kjörfurstahöll. Í miðbæ Tríer er að finna Hauptmarkt, aðalmarkaðstorg borgarinnar. Þar standa fallegar byggingar, gosbrunnar og skemmtileg kaffihús og hér er gott að setjast niður og virða fyrir sér mannlífið. Þess má geta að þekktasti borgari Tríer í nútímasögu er Karl Marx en æskuheimili hans stendur á Brückenstrasse skammt frá Hauptmarkt og í dag hefur það verið gert að safni. Það er einnig tilvalið að rölta um og skoða í verslanir borgarinnar til dæmis á Simeonstrasse og Fleischstrasse.

Í dag verður haldið til Bingen þar sem gist verður í þrjár nætur á hóteli við Rínarfljótið. Nú verður byrjað á að fara í skemmtilega skoðunarferð um elsta hluta bæjarins. Bingen var einn af virkisbæjum Rínardalsins og er enn hægt að sjá leifar frá þeim tíma. Bærinn er líflegur og skemmtilegur með fallegum torgum og það er sérstaklega gaman að skoða saltstrætin með sínum sögufrægu byggingum en áður fyrr bjuggu hér ríkir saltkaupmenn. Á aðaltorgi bæjarins er matarmarkaður og kirkja heilags St. Martin. Eftir skoðunarferð verður frjáls tími fram að brottför frá hótelinu okkar til Sankt Goar þar sem fljótabátur bíður okkar. Við siglum eftir ánni Rín í átt að hinum fræga Loreley kletti, fram hjá köstulum, virkjum og bæjum upplýstum með logandi blysum. Á leiðinni njótum við stórkostlegrar flugeldasýningar sem heimamenn kalla „Rhein in Flammen“ eða ljósadýrð á Rín og gæðum við okkur á kvöldverði um borð.

Í dag bíður okkar dásemdardagur við ána Rín en nú verður siglt frá Bingen yfir til Rüdesheim. Við eigum ljúfan dag í þessum yndislega bæ sem þekktur er fyrir fallegu gömlu bindingsverkshúsin sín og líflegu skemmtigötuna Drosselgasse. Þessi gata er heimsfræg fyrir einstakt andrúmsloft sem skapast þegar flutningur tónlistarmanna ómar frá fjölmörgum veitingahúsum götunnar. Fyrir áhugasama gefst tækifæri til að fara með svifkláfi upp í vínhæðirnar fyrir ofan bæinn. Þar stendur minnisvarði sem byggður var seint á 19. öld til minningar um fyrri sameiningu Þýskalands en þaðan er glæsilegt útsýni yfir Rínardalinn og bæjarstæðin við ána. Farið verður í stutt rölt um Rüdesheim en eftir það er frjáls tími. Við gefum okkur góðan tíma í þessum skemmtilega bæ því margt er að skoða og upplifa inni á milli fallegu bindingsverkshúsanna áður en siglt verður til baka.

Nú verður ekið til Koblenz sem stendur við ármót Mósel og Rín en þær mætast við hið svokallaða Deutsches Eck og það er oft nefnt eitt fallegasta horn Þýskalands. Hér förum við í skoðunarferð um þessa sögufrægu borg sem er rúmlega 2000 ára gömul. Það er gaman að skoða gamla miðaldabæinn en hann prýða glæstar byggingar, fallegar kirkjur, þröngar litlar götur og gömul bindingsverkshús. Eftir það verður gefinn frjáls tími til að kanna borgina á eigin vegum. Við endum svo daginn með trompi hjá einum vínbónda Móseldalsins.

Nú er komið að heimferð eftir dásamlega daga. Eftir morgunverð verður ekið til Frankfurt. Flug þaðan er kl. 14:00 og lending í Keflavík kl. 15:45 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Park Plaza í Trier

HH Hotel í Bingen