Algarve & Torremolinos

Fyrrum sjávarþorpið Albufeira með sínum litlu töfrandi götum og hvítu húsum bíður okkar en gamli bærinn í Albufeira er tvímælalaust með fallegustu stöðum Algarve og einn þekktasti ferðamannabær héraðsins. Suðurhluti Portúgals er einn af aðlaðandi orlofsstöðum Evrópu og býður upp á milt loftslag allt árið um kring, leyndar víkur, stórbrotna kletta og heillandi þorp. Austan við Albufeira liggur hin fallega strönd Praia de Falésia með ryðrauða kletta í baksýn. Hér ætlum við að njóta lífsins og rölta um og skoða það sem bærinn býður upp á. Möguleiki er að fara í stutta siglingu eða setjast á skemmtileg kaffi- eða veitingahús sem sum bjóða upp á frábært útsýni yfir ströndina Praia dos Pescadores og hafið. Áhugavert fornleifasafn er í borginni þar sem skoða má minjar frá tímabilinu milli forsögu og miðalda, með áherslu á rómverska- og mára tímabilið. Hér verður frjáls tími til að njóta á eigin vegum og upplagt að taka með sér strandföt.

Dekurdagur og rólegheit, hér getur hver og einn notið þess að skoða sig um á þessum skemmtilega stað eða nýtt aðstöðuna á hótelinu. Hér eru hvítkölkuð hús með fallegum flísamyndum, steinilagðar götur og skemmtilegar verslanir. Á aðaltorgi bæjarins, Praça da República, er ánægjulegt að setjast á kaffihús og fylgjast með mannlífinu. 

Nú er komið að því að kveðja Travira og Portúgal eftir yndislega daga. Stefnan verður tekin á Torremolinos en á leiðinni þangað verður áð í höfuðborg Andalúsíuhéraðs á Spáni, Seville, þar sem farið verður í ljúfa skoðunarferð um borgina. Seville blómstraði eftir landafundina í Ameríku og efnaðist mjög á nýlendutímum Spánverja. Kristófer Kólumbus mun einnig hafa skipulagt sjóferð sína til að finna Ameríku frá Seville. Hér er margt fallegt að sjá, dómkirkja borgarinnar La Giralda er sú stærsta á Spáni og með þeim stærstu í heimi en úr klukkuturninum er hægt að njóta útsýnis yfir alla borgina. Það er töfrandi að rölta um fyrrum gyðingahverfið Barrio de Santa Cruz þar sem finna má fallegar hallir, m.a. fallegustu höll Andalúsíu, Real Alcázar frá tímum Máranna, íburðarmikil heimili og glæsileg torg. Parque Maria Luisa garðurinn er yndislegur og má segja að þetta fallega græna svæði sé lunga borgarinnar en það geymir eitt fallegasta torg hennar, Plaza España. Seville er einnig sögusvið frægu óperunnar Carmen. Eftir góðan tíma í þessari fallegu borg heldur ferð okkar áfram til Torremolinos við Costa de Sol ströndina þar sem við dveljum næstu sex nætur. Á hótelinu okkar eru tvær sundlaugar, líkamsrækt, heilsulind og baðströnd. 

Í dag er frjáls tími til að njóta lífsins í bænum Torremolinos sem er staðsettur á hinni dásamlegu sólarströnd Spánar, Costa del Sol. Hér er tilvalið að kanna fallegar strandir, sóla sig, fá sér sundsprett eða ganga meðfram standgötunni Paseo Marítimo en þar er urmull kaffihúsa og veitingastaða. Einnig er hægt að kíkja í verslanir, til dæmis á aðalverslunargötu bæjarins Calle San Miguel. 

Í dag sækjum við heim einn fallegasta bæinn í Andalúsíu, Ronda, en þar búa um 37.000 manns. Bæjarstæðið er einstakt þar sem bærinn stendur á gilbrúnum Guadelvin árinnar, hér mætast stórbrotið landslag, saga og kjarni spænskrar menningar. Yfir gilið liggur hin fallega brú, Puente Nuevo, en hún tengir saman eldri og yngri hluta bæjarins. Beggja vegna brúarinnar er dásamlegt útsýni yfir bæinn, djúpt gilið og dalinn fyrir neðan. Gamli bærinn, La Ciudad, er fylltur mjóum steinilögðum götum með fallegum torgum og byggingum. Í Ronda voru háðir miklir bardagar í spænsku borgarastyrjöldinni 1936-1939 og einnig er frægt atriði í skáldsögu Ernest Hemingways, Hverjum klukkan glymur, sagt vera innblásið af raunverulegum atburðum héðan. Ronda er þekkt sem upphafsstaður nútíma nautaats og þar er að finna einn elsta nautaatsvöll Spánar, Plaza de Toros. Eftir skoðunarferð ætlum við að kynna okkur vínframleiðslu á svæðinu og fá að smakka á afurðum heimamanna ásamt léttum hádegisverði. 

Nú liggur leið okkar til Málaga en hún hefur umbreyst mikið á seinustu 15 árum. Hér hefur verið ráðist í miklar endurbætur á miðbænum, strandgötunni og höfninni. Málaga er lífleg borg og þar er skemmtileg blanda, menningar og sögu. Hér er að finna Alcazaba, gamalt virki Mára sem byggt var á 11. öld, þar eru fallegir garðar og tilkomumikið útsýni yfir borgina. Frá Gibralfaro kastala sem situr á hæð fyrir ofan borgina er fallegt útsýni og mikil fjallasýn. Eftir skemmtilega skoðunarferð verður gefin frjáls tími til að upplifa borgina, líta inn á kaupmenn borgarinnar og fá sér hressingu áður en ekið verður á hótel. 

Hin vinsæla suður spænska borg Marbella höfðar til næstum allra með fjölbreyttum náttúrutöfrum sínum, fallegri strandlengju, lystisnekkjuhöfn og fjallafegurð. Virkar eins og friðsælt sjávarþorp með sínum eigin sjarma og glitrandi hvítu byggingum.Fjölmargir listamenn og virkilega vel stætt fólk frá öllum heimshornum laðast eins og segull að borginni á hverju ári og orðatiltækið „Marbella er hreinn lífsstíll“ hefur orðið til. Borgin á sína sögu og yfirbragð sem er skemmtilegt að upplifa í völundarhúsi gamla bæjarins með sínum sögulegu byggingum og dæmigerðu litlu veitingahúsum þar sem boðið er upp á tapas og aðra staðbundna rétti. Hér gefum við okkur góðan tíma til að njóta og kanna líf bæjarbúa sem er fjölbreytilegt og litríkt. Upplagt er að fá sér hressingu áður en ekið verður til baka.

Við höldum áfram að njóta okkar í Torremolinos og nú er frjáls tími. Upplagt er að skoða La Carihuela hverfið þar sem miðbærinn er. Það er í suðvestari enda bæjarins og íbúar þar lifðu mikið á sjávarnytjum á árum áður. Í dag eru hér bestu sjávarréttarstaðirnir í Torremolinos og víða eru skemmtilegar litlar götur með hvítkölkuðum húsum sem eru blómum skrýdd. Hér ríkir afslappað andrúmsloft. Fyrir þá sem vilja er gaman að fara í gönguferð, kíkja í verslanir eða fá sér tapasrétti á einum af fjölmörgum stöðum bæjarins.

Eftir glæsilega og skemmtilega ferð verður ekið út á flugvöll í Málaga. Brottför þaðan kl. 22:40 og lending í Keflavík kl. 01:30 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

• 20. - 25. ágúst - Tavira - Hotel Vila Gale Tavira
• 25. -31 ágúst  - Torremolinos - Hotel Melia Torremolinos