Suður-Frakkland & Spánn

Eftir morgunverð höldum við til Camargue, sem er friðlýst vatnasvæði myndað af árframburði Rhône. Þar má sjá flamingóa, svört naut  og hvíta arabíska hesta. Á leiðinni verður komið við í bænum Aigues Mortes sem oft er nefndur Þyrnirósarbærinn. Hann er umkringdur fallegum borgarmúr og þar var ein af mikilvægustu konungshöfnum við Miðjarðarhafið. Næst verður ekið til Saintes-Maries-de-la-Mer, pílagrímsbæ rómafólks í Evrópu sem dregur nafn sitt af þremur konum sem allar báru nafnið María og komu frá Palestínu en ein þeirra var María Magdalena. Þar verður Notre dame de la Mer kirkjan frá 11.-12. öld skoðuð og auðvitað verður gefin tími til að njóta náttúrufegurðar bæjarins við Miðjarðarhafið.

Nú yfirgefum við Avignon eftir töfrandi daga og höldum til Spánar. Á leið okkar heimsækjum við Figueres, fæðingarstað Salvador Dalí. Dalí safnið er eitt helsta aðdráttarafl ferðaþjónustunnar í Katalóníu og það er algjört ævintýri að koma þar inn en Dalí hannaði sjálfur safnið. Bærinn er mjög líflegur og skemmtilegur og upplagt er að fá sér hressingu áður en farið verður inn á safnið. Síðdegis höldum við ferð okkar áfram til miðaldabæjarins Tossa de Mar við Costa Brava ströndina. Hér munum við gista í sex nætur á góðu hóteli. 

Við hefjum daginn á skemmtilegri gönguferð um Tossa de Mar. Við förum meðal annars upp í elsta hlutann, klettabæinn Vila Vella, sem er umkringdur borgarmúrum og turnum frá 14. öld. Að koma inn í Vila Vella er eins og að ferðast aftur í tímann en það er enn búið í nokkrum gömlu húsanna innan virkisveggjanna. Stórfenglegt útsýni er þaðan yfir gjörvalla klettaströnd Tossa. Að skoðunarferðinni lokinni gefst hverjum og einum frjáls tími til að kanna umhverfið á eigin vegum. Fyrir áhugasama eru fornar minjar frá rómverskum tímum að finna í nágrenni hótelsins en í bænum eru einnig margar huggulegar, litlar verslanir.

Barcelona, höfuðborg Katalóníu, er með fegurstu borgum álfunnar. Hún er þekkt fyrir glæsilegar byggingar arkitektsins Gaudí sem skreyta borgina hvert sem litið er. Barcelona er mjög gömul borg og saga hennar merkileg. Fegurð hennar og gestrisni íbúanna gera dvölina alveg einstaka. Af merkum byggingum eftir Gaudí má nefna kirkjuna La Sagrada Familia, húsin Casa Battló og Casa Milá og garðinn Güell en þessi verk Gaudí eru öll komin á heimsminjaskrá UNESCO. Gotneska hverfinu má ekki gleyma og kirkjunni við hafið sem er dásamleg og margir þekkja úr bók Ildefonso Falcones. Við höfum einnig tíma til að kanna líf bæjabúa og líta inn á líflega kaupmenn borgarinnar.

Að loknum morgunverði verður farið í siglingu til Lloret de Mar, eins vinsælasta ferðamannabæjarins við ströndina. Þetta er mjög snotur bær sem gaman er að rölta um en þar er m.a. að finna fallegu kirkjuna Sant Roma frá 16. öld. Einnig er hægt að fara í  góða göngu eftir ströndinni að miðaldavirkinu Sant Joan. Hér verður gefin góður tími til að njóta og upplagt að fá sér hressingu áður en ekið verður til baka.

Frjáls dagur til að hvíla sig og njóta lífsins, fara í dekur á heilsulind hótelsins eða kanna umhverfið í rólegheitum. Í bænum kennir margra grasa menningar- og mannlífs, sem gaman er að kynna sér í rólegheitunum.

Í dag heimsækjum við Montserrat klaustrið sem stofnað var á 9. öld en það stendur í 720 m hæð og er staðsett í Monserat fjalli í samnefndum þjóðgarði. Kirkjan er frægust fyrir líkneskið af dökkri Maríu mey en það hangir fyrir ofan altarið og er sagt að það boði gæfu að skoða hana og snerta. Um hádegisbil gefst færi á að hlýða á tvö lög hjá hinum fræga drengjakór klaustursins, Escolania de Montserrat. Í kórnum eru 50 drengir á aldrinum 9 -14 ára sem syngja þar næstum daglega. Þar er einnig listasafn sem geymir m.a. myndir eftir Picasso, Dalí, Miro og Degas. Útsýnið frá klaustrinu er stórbrotið og fjallasýnin ólýsanleg. Hægt er að fara með kláf upp á hæsta tindinn, Sant Jeroni, sem er í 1.235 m hæð yfir sjávarmáli.

Eftir yndislega daga á Spáni, kveðjum við Tossa de Mar og ökum til Barcelona flugvallar. Brottför þaðan kl. 15:45 og lending í Keflavík kl. 18:20 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

• Hotel Cloitre Saint Louis í Avignon
• Hotel Bahia í Tossa de Mar