Litríkt landslag & menning á Grænlandi

Í þessari einstöku ferð kynnumst við stórbrotinni náttúru Grænlands, íbúum þess og menningu að fornu og nýju. Suður-Grænland býður upp á undurfagurt og ósnortið landslag, jökulheima, heiðalönd, firði og fjörur. Við gistum tvær nætur í bænum Narsaq en hann stendur undir bæjarfjallinu Qaqqarsuaq. Hér er loftslagið milt á grænlenskan mælikvarða og þetta er því einn af fáum stöðum þar sem aðstæður eru til jarðyrkju og sauðfjárræktar. Við munum kynnast bænum Narsaq vel og hvernig menning Grænlendinga hefur þróast frá fornu fari til vorra daga. Á þessu svæði eru einnig helstu minjar um búsetu norrænna manna á Grænlandi. Miklir skriðjöklar ganga út úr Grænlandsjökli fram í sjó og við munum sigla um Qalerallit fjörð á milli tignarlegra ísjaka. Það er mikilfenglegt þegar eyru og augu verða vitni að því þegar bláir jakarnir brotna af jöklinum og steypast niður í sjó með braki og brestum. Við komum í Hvalseyrarfjörð þar sem finnast rústir af byggingu sem reistar voru af norrænum mönnum en það er kirkjan að Hvalseyri. Við dveljum á Görðum og sjáum minjar gamla biskupssetursins. Við skoðum einnig  Bröttuhlíð við Eiríksfjörð, þar sem þau Eiríkur rauði, Þjóðhildur kona hans, Leifur heppni og fleiri afkomendur þeirra hjóna bjuggu. Í þessari ferð fléttast saman saga, menning og náttúra í mögnuðu mannlífi og landslagi Grænlands.