Alpadýrð Königssee & Innsbruck

Bærinn Bad Reichenhall er í dag þekktastur sem heilsubær og þá einkum vegna saltsins sem þar finnst en fyrr á öldum var hann mikilvægur saltnámubær. Fundist hafa merki um saltvinnslu allt frá tímum Rómverja og fyrr og til eru heimildir allt frá 12. öld sem vitna til saltsins sem hvíta gullsins enda var það ein verðmætasta vara sem völ var á. Við förum í skemmtilega skoðunarferð um áhugaverðustu staði bæjarins og eftir það verður frjáls tími til að njóta dagsins á þessum fagra stað. Hér er skemmtileg göngugata með verslunum en bærinn hefur verið að þróast mikið eftir því sem fleiri gestir koma og sækja í heilsulindirnar og hér má nú finna skemmilegar sérverslanir, gallerí, fataverslanir, veitingastaði, kaffihús og fleira. Heimafjöll bæjarins eru Hochstaufen (1771 m) og Predigstuhl (1613 m) en frá bænum er hægt að fara með kláf upp á Predigstuhl fjallið.

Við kveðjum þennan yndislega stað eftir góða daga en nú verður ekið í átt að Zell am See vatninu þar sem fegurðin lætur ekki á sér standa og við stoppum og njótum dýrðarinnar. Ferð okkar heldur áfram og nú verður ekið yfir Gerlosskarðið inn í dalinn Zillertal. Á leiðinni verður stoppað við glæsilegustu fossa austur Alpanna en tignarlegir Krimmlerfossarnir í Salzachdalnum falla milli háu Tauernfjallanna og Kitzbühel Alpanna. Eftir gott stopp þar verður ekið til bæjarins Mayrhofen í Zillertal en dalurinn sem er við jöklasvæði Zillertal Alpanna er oftast kallaður dalur söngsins, því þar er bæði jóðlað og sungið. Upplagt er að fá sér hressingu og njóta dýrðar dalsins. Við ökum að lokum til Innsbruck, höfuðborgar Tíról í Austurríki sem hvílir hér í fjalladýrðinni í Inndalnum. Hér verður gist í fjórar nætur.

Miðaldahluti Innsbruck er sérstaklega heillandi en hún var ein af borgum Habsborgaranna. Habsborgara keisaraættin var ein mikilvægasta konungsætt Evrópu og var blómatími borgarinnar á 15. öld undir stjórn Maximilian I af Habsborg. Hann lét byggja húsið með gullþakinu sem stendur við eitt fallegasta torgið í Tíról og vekur jafnan mikla athygli. Borgin var á þeim tíma ein af menningar- og listaborgum landsins. Hér höldum við í stutta skoðunarferð en eftir hana verður hægt að kanna borgina á eigin vegum, líta inn til kaupmanna í Maria Theresien Straße og setjast inn á skemmtileg kaffi- eða veitingahús. Um kvöldið verður farið á Tírólakvöld hjá Gundolf fjölskyldunni

Í dag verður farið með lest og kláfi upp á hæsta fjall Þýskalands, Zugspitze, sem er í 2.963 m hæð. Þaðan er stórkostlegt útsýni yfir þýsku og austurrísku Alpana. Á leiðinni til baka verður komið við í bænum Mittenwald, sem á sér engan líka með litlum myndskreyttum húsum og skemmtilegum verslunum. Bærinn er frægur fyrir smíði strengja- og plokkhljóðfæra og þar stendur minnisvarði af Matthias Klotz, upphafsmanni fiðlusmíði í Mittenwald, fyrir utan fiðlusafn bæjarins.

Nú er frjáls dagur á eigin vegum og upplagt að skoða Innsbruck betur, rölta um og njóta fjallafegurðar borgarinnar. Það er hægt að fara í Hop-on Hop-off strætó til að fá betri yfirsýn yfir borgina og nágrenni. Í slíkri strætóferð eru áhugaverð stopp fyrir utan miðborgina sem er tilvalið að sjá með þessum hætti án þess að þurfa að ganga. Strætóinn gengur að Bergisel skíðastökkpallinum, Tíról Panorama safninu með hinu fræga risastóra hringlaga málverki og að Ambras kastala sem stendur í hlíðunum fyrir ofan borgina. Hægt er að taka Hungerburgkláfinn sem liggur frá miðborginni og upp í fjallið Hafelekarspitze. Þaðan er glæsilegt útsýni yfir borgina og Inndalinn. Einnig er hægt að njóta þess að sitja á skemmtilegu kaffi- eða veitingahúsi við fallegasta torgið í Tíról og horfa á mannlífið eða líta inn til kaupmanna borgarinnar sem eru ófáir.

Nú er komið að því að kveðja eftir ljúfa daga. Ekið verður til München en brottför er kl. 14:05 og lending í Keflavík kl. 16:00 að staðartíma.

• 4 nætur - Bad Reichenhall - Amber Hotel Bavaria

• 4 nætur - Innsbruck - Hotel Das Innsbruck