Costa del Azahar & Valencia

Eftir morgunverð höldum við ferð okkar áfram suður eftir Miðjarðarhafsströnd Spánar. Stefnan verður tekin á Costa del Azahar eða Costa dels Tarongers eins og Katalóníubúar kalla hana, Appelsínuströndina. Nafngiftin kemur frá gnægð appelínulunda sem setja svip sinn á umhverfið. Á leiðinni verður stoppað í fallegu héraðshöfuðborginni Tarragona á Costa Dorada. Rómversk saga er hér alltumlykjandi en Rómverjar kölluðu borgina Tarraco. Margar af vel varðveittum rómverskum byggingum eins og hringleikahúsið eru á heimsminjaskrá UNESCO. Því næst verður ekið áfram til Peñíscola þar sem við gistum næstu átta nætur. Peñíscola er á lista yfir fallegustu bæi Spánar og er einnig sögulegt verndarsvæði. Hótelið okkar stendur við ströndina og þar er útisundlaug, pottur og sólbekkir. Þar er einnig líkamsrækt og heilsulind með sánu og tyrknesku baði. 

Við ströndina er ólýsanlega fagurt, þar er röð pálmatrjáa og rómantískur miðaldablær svífur yfir. Við sjáum fyrrum páfahöllina, Castell Papa Luna, og vita bæjarins sem stendur uppi á háum kletti í 67 metra hæð. Stórbrotið landslagið hefur þjónað sem umgjörð í kvikmyndum og sjónvarpsþáttum og má þar nefna El Cid með Sophiu Loren og Charlton Heston og Game of Thrones. Gamli bærinn er heillandi með litlum kalkhvítum húsum sem lokuð eru af með borgarmúrum og kastala frá miðöldum. Efti hádegi förum í töfrandi skoðunarferð um bæinn og kastalann og njótum náttúrufegurðar staðarins. Eftir það verður gefin tími til að skoða bæinn, njóta aðstöðunnar við hótelið eða taka sér sundsprett í Miðjarðarhafinu.

Þessi frábæra dagsferð leiðir okkur aftur til miðalda um Maestrazgo svæðið með sínum ólífu- og möndlutrjám. Við heimsækjum Morella en þessi miðaldabær tilheyrir takmörkuðum fjölda borga um allan heim sem hafa varðveist nær fullkomlega sem sögulegt safn. Er hann eitt besta dæmi um uppbyggingu miðaldabæja, umkringdur miklum borgarmúr með turnum og hliðum en Morella er einnig á heimsminjaskrá UNESCO. Eftir það verður ekið í skemmtilega heimsókn til ólífubónda þar sem boðið verður upp á hádegissnarl, m.a. tortilla de papas, skinku, ost og vín en einnig verður ólífuræktunin skoðuð. Héðan fara allir saddir og sælir heim á hótel eftir yndislegan dag. 

Í dag förum við töfrandi leið með Costa del Azahar ströndinni og að Ebro Delta sem er þýðingarmesta vistkerfi vestanverðs Miðjarðarhafsins. Við upplifum heillandi heim svæðisins á siglingu um Ebro Delta, að ósum hennar þar sem eyjarnar Buda og Sant Antoni liggja en þarna eru víðáttumiklar sléttur. Hér verður boðið upp á hádegishressingu í bænum Amposta og svo gefst frjáls tími til að kíkja á mannlífið. Síðan verður ekið til baka um Ebro Delta svæðið þar sem við upplifum fuglaparadísina og sjáum breiður hrísgrjónaakra og e.t.v. hópa af flamingóum. Þetta er fögur leið og við munum einnig aka um fallega bæi á leiðinni til baka til Peñíscola.

Þessum degi ætlum við að eyða í sögufrægu borginni Valencia en tímalaus fegurð hennar er einstaklega heillandi. Á göngu okkar um elsta hluta borgarinnar komumst við í tæri við meira en 2000 ára sögu hennar, þ.á m. gotnesku bygginguna La Lonja, fyrrum skiptimarkað með silki, sem nú er komin á heimsminjaskrá UNESCO. Rétt eins áhrifamikil er dómkirkjan sem byggð er á rústum mosku. Í meira en þúsund ár hefur fundur hins einstaka vatnadómstóls (Tribunal de les Aigües de València) sem ráðstafar vatnsréttindum, verið haldinn vikulega við inngang dómkirkju Valencia, hjá styttunum af tólf lærisveinum Jesú, Los Aposteles. Við reikum um þröngar götur borgarinnar og töfrar hennar hrífa okkur með sér. Auðvitað verður gefinn frjáls tími til að fá sér hressingu og upplifa borgina á eigin vegum. Endum daginn í lista-, menningar- og vísindahverfinu með sínum nútímabyggingum og skúlptúrum en hverfið er orðið eitt mesta aðdráttarafl borgarinnar og talið einn af 12 dýrmætustu fjársjóðum Spánar á sviði húsagerðarlistar, menningar, sögu, og lista.

Þjóðgarðurinn Sierra del Espadán tekur á móti okkur í dag og nú verður ekið til La Vall d'Uixó. Farið verður á bátum í gegnum ótrúlegt náttúrufyrirbæri, neðanjarðarhella sem lengsta neðanjarðará í Evrópu, San José, rennur um. Við líðum áfram á kristaltæru bláu ánni, sjáum leðurblökusalinn og sal djöflavatnsins eins og hann er kallaður. Eftir það verður ekið til bæjarins Vilafamés sem talinn er með fallegustu smábæjum Spánar og hefur að geyma miðaldakastala sem varðveitir fornar leifar frá rómverskum, márískum og kristnum tíma. Einnig gefst tími til að rölta um á eigin vegum, fá sér hádegishressingu og njóta dagsins.

Nú er komið að því að slaka á eftir annasama daga á þessum fagra stað. Hægt er að nýta sér aðstöðuna á hótelinu eða ganga með pálmaströndinni inn í Peñíscola, kanna þennan fallega bæ betur og líta inn á kaupmenn bæjarins. Og síðast en ekki síst er auðvitað nauðsynlegt að fá sér sundsprett í Miðjarðarhafinu seinnipart dags.  

Góður dagur í rólegheitum og við njótum samverunnar á þessum fagra stað. Við flatmögum við sundlaugina og þeir sem vilja, geta tekið litla smálest, hop on hop off, um svæðið. Boðið er upp á fjórar leiðir, tvær um nágrennið, útsýnisferð og ferð um Peñíscola. Bátsferðir eru einnig í boði frá litlu bátahöfninni.

Nú er komið að því að kveðja þennan draumfagra stað og aka á flugvöll í Barcelona. Brottför þaðan kl. 15:45 og lent í Keflavík kl. 18:20 að staðartíma. 

Fararstjóri getur fært dagskrárliði á milli daga eftir þörfum þegar komið er á staðinn.

7. - 10. júní = Barcelona = Catalonia Diagonal Centro
10. - 18. júní = Peniscola = Hotel Peniscola Palace