Töfrar Toskana & Assisi

3. - 13. apríl 2025 (11 dagar)

Töfrandi blær Toskana héraðsins og yndislegt andrúmsloft rivíerunnar við Miðjarðarhafið, með blaktandi pálmatrjám og hrífandi ströndum, leika við okkur í þessari ferð. Á leið okkar um hina undurfögru Versilíaströnd látum við fara vel um okkur í Forte dei Marmi sem er með þekktustu ferðamannabæjum strandarinnar. Á leiðinni þangað verður siglt frá Rapallo til fræga og fagra bæjarins Portofino. Farið verður í ævintýralegar ferðir þar sem við kynnumst menningu og listum landsins. Við siglum úti fyrir Cinque Terre ströndinni með viðkomu í þorpunum Vernazza, Monterosso og Portovenere og upplifum einstaka fegurð Ítalíu. Við komum til Lucca, sem er ein af gömlu virkisborgunum og eigum góða stund hjá vínbónda í nágrenninu. Einnig heimsækjum við Flórens, eina glæsilegustu lista- og menningarborg landsins. Við stöldrum við í Pisa þar sem við skoðum skakka turninn, basilíkukirkjuna og skírnarkapelluna. Við dveljum einnig í miðaldavirkisborginni Assisi sem tekur á móti okkur í allri sinni dýrð og skoðum þar kirkjurnar San Francesco og Santa Chiara. Á rölti um Assisi njótum við friðsæls andrúmslofts og byggingarlistar frá miðöldum. Í þessari töfrandi og skemmtilegu ferð verður jafnframt hægt að slaka á og njóta þessa heillandi svæðis við Miðjarðarhafið. 

Verð á mann 364.400 kr.

Aukagjald fyrir einbýli 43.500 kr.


Innifalið

  • 11 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgun- og kvöldverðir á öllum hótelum.
  • Sigling frá Rapallo til Portofino.
  • Heimsókn og snarl hjá vínbónda. 
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur. 
  • Hádegisverðir.
  • Töskuburður á hóteli í Assisi.
  • Þjórfé.
  • Forfalla- og ferðatryggingar. 

Valfrjálst

  • Aðgangur í kirkjuna og skírnarkapelluna í Pisa u.þ.b. € 18.
  • Sigling við Cinque Terre u.þ.b. € 35.

Nánari upplýsingar

  • Vert er að hafa í huga að þrátt fyrir að Bændaferðir séu alla jafna þægilegar rútuferðir er alltaf einhver ganga, t.d. í bæjarferðum. Margar evrópskar borgir eru bæði hæðóttar og ójafnar undir fæti og aðgengi að áfangastöðum þannig að leggja þarf rútunni mislangt frá. Ef þú hefur einhverjar vangaveltur varðandi þetta vinsamlegast ekki hika við að hafa samband við skrifstofu Bændaferða.

Kort af ferðinni

FerðalýsingPrenta ferðalýsingu

3. apríl | Flug til Mílanó

Brottför frá Keflavík kl. 08:20, mæting í Leifsstöð í síðasta lagi 2,5 klst. fyrir brottför. Flogið verður til Mílanó og lent kl. 14:30 að staðartíma. Þaðan verður ekin fögur leið á gististað sem er í nágrenni við Mílanó þar sem gist verður fyrstu nóttina

4. apríl | Rapallo, Portofino & Forte dei Marmi

Í dag liggur leið okkar að Versilíaströndinni í Toskanahéraði, nánar tiltekið til strandbæjarins Forte dei Marmi þar sem gist verður í sex nætur á hóteli sem er aðeins 200 metra frá ströndinni. Á leiðinni til Forte dei Marmi verður stoppað í bænum Rapallo við ítölsku rivíeruna. Þar verður farið í skemmtilega siglingu með fram Portofino skaganum sem dregur nafn sitt af bænum fræga Portofino sem við komum til með að njóta í allri sinni dýrð. Upplagt að fá sér hressingu þar og kanna líf bæjarbúa sem er litríkt og skemmtilegt.

5. apríl | Forte dei Marmi & frjáls tími

Við hefjum daginn á góðum morgunverði og njótum þess að vera á þessum fagra stað sem er einn af fáguðustu ferðamannstöðunum við Versilíaströndina og er þekktur fyrir lúxusverslanir, vandaða veitingastaði og glæsihýsi. Nú ætlum við að rölta saman inn í miðbæ Forte dei Marmi og kanna líf bæjarbúa. Eftir það er hægt að líta inn í úrval fínna verslana, eða staldra við og fá sér hressingu eða máltíð.

Opna allt

6. apríl | Sigling við Cinque Terre ströndina

Í dag verður farið í ævintýralega siglingu úti fyrir Cinque Terre ströndinni, einu stórfenglegasta svæði ítölsku rivíerunnar. Það er svo sannarlega ekki að ástæðulausu að Cinque Terre svæðið fór á heimsminjaskrá UNESCO árið 1997. Siglt verður til Portovenere, Vernazza og Monterosso. Auðvitað verður stoppað til að fá sér hádegishressingu og kanna líf bæjarbúa í nokkrum vel völdum bæjum strandarinnar.

7. apríl | Ferð til Lucca & snarl hjá vínbónda

Við heimsækjum borgina Lucca í dag. Borgin er helst þekkt sem gömul virkisborg en á 13. og 14. öld var hún ein af valdamestu borgum Evrópu. Mikilfenglegir virkisveggir hennar frá miðri 17. öld eru enn uppistandandi. Tónskáldið Puccini er fæddur í borginni og er húsið sem hann fæddist í safn í dag. Við höldum í skoðunarferð um helstu staði borgarinnar og að henni lokinni verður vínbóndi sóttur heim þar sem boðið verður upp á smá snarl og auðvitað vín bóndans.

8. apríl | Pisa & Kraftaverkatorgið

Það er alltaf svo yndislegt að koma til borgarinnar Pisa sem er þekktust fyrir skakka turninn á torginu, Piazza dei Miracoli. Bygging turnsins hófst árið 1173 og var þessum frístandandi klukkuturni, sem tilheyrir dómkirkjunni í Pisa, ætlað að standa lóðrétt en eftir byggingu annarrar hæðar hans tóku undirstöður turnsins að síga. Turninn er eitt af þremur mannvirkjum á Campo dei Miracoli eða Kraftaverkatorginu í Pisa. Við höldum í góða skoðunarferð um svæðið en eftir það er tími til að kanna staðinn á eigin vegum og fá sér hressingu.

9. apríl | Rólegheit í Forte dei Marmi & útimarkaður

Í dag er markaður í Forte dei Marmi sem gaman er að kíkja á fyrir hádegi og njóta þess svo að eiga rólegan eftirmiðdag á eigin vegum.

10. apríl | Dagur í Flórens & Assisi

Nú kveðjum við Forte dei Marmi eftir yndislega daga. Nú er komið að einum hápunkti ferðarinnar. Það eru fáar borgir sem komast í hálfkvisti við Flórens. Hver kannast ekki við snillinga á borð við Leonardo da Vinci, Michelangelo, Botticelli, Galileo Galilei, Dante og Machiavelli en allir mörkuðu þeir sögu borgarinnar. Flórens er höfuðborg Toskanahéraðs og liggur á hásléttu rétt sunnan við Appenínafjöllin. Farið verður í skoðunarferð og að henni lokinni gefst fólki tækifæri til að upplifa borgina eftir eigin hentisemi, skoða áhugaverð kennileiti enn frekar, fara á söfn eða kynna sér framboð fjölmargra verslana eða veitingastaða borgarinnar. Eftir glæsilegan dag verður ekið fögur leið til Assisi í Umbria héraði þar sem gist verður næstu þrjár nætur á vel staðsettu hóteli.

11. apríl | Skoðunarferð um Assisi

Helgi staðurinn Assisi er yndislegur virkisbær frá miðöldum í miðju Umbria héraði og er bærinn á heimsminjaskrá UNESCO. Hér var heilagur Frans frá Assisi fæddur sem var predikari og boðaði meinlætislíf og höfnun veraldlegra gæða. Hann stofnað hér reglu heilags Frans og reglu heilagrar Klöru frá Assisi. Við förum í skoðunarferð um Assisi og að sjálfsögðu skoðum við kirkjurnar San Francesco og Santa Chiara og eftir það verður góður tími til að skoða sig um og kanna líf bæjarbúa á eigin vegum.

12. apríl | Ljúfur dagur í Assisi

Í dag gefst góður tími til þess að njóta líðandi stundar. Andrúmsloftið í Assisi er gjarnan friðsælt og þar sameinast saga trúar og menningar. Margar götur gamla miðbæjarins eru eingöngu ætlaðar gangandi vegfarendum. Á rölti um bæinn gefur að líta byggingarlist miðalda og falleg torg í bland við verslanir, veitinga- og kaffihús. Bærinn er byggður á hæð og þaðan er falleg sýn yfir landslag Umbria héraðs sem umlykur bæinn.

13. apríl | Heimferð frá Róm

Nú kveðjum við Assisi eftir yndislega daga. Við leggjum snemma af stað og nú verður stefnan tekin á flugvöllinn í Róm. Brottför heim til Íslands kl. 15:45, áætluð lending í Keflavík er áætluð kl. 18:35 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Hótel

  • 1 nótt í nágrenni Mílanó - Dolce Milan Malpensa Hotel
  • 6 nætur - Forte dei Marmi - Hotel Atlantico
  • 3 nætur - Assisi - Giotto Hotel & Spa

Myndir úr ferðinni

Fararstjórn

Marianne Eiríksson

Marianne fæddist 1964 í Schaffhausen í Sviss, við landamæri Þýskalands. Hún er menntaður ferðamálafræðingur en kom til Íslands í fyrsta skipti árið 1985 og dvaldist þá á sveitabæjum í nokkra mánuði. Síðan 1992 hefur Marianne búið á Íslandi með íslenskum eiginmanni sínum. Hún er útskrifuð frá leiðsöguskólanum og starfar m.a. sem leiðsögumaður.
Marianne segist sjálf vera orðin meiri Íslendingur en Svisslendingur en hún talar þýsku, ensku, frönsku, ítölsku og að sjálfsögðu reiprennandi íslensku.
Áhugamál Marianne eru ferðalög, tungumál og hestamennska.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Póstlisti

Skrá á póstlista