Páskar í Lissabon

Það er kærkomið að fá frjálsan dag og kynnast þessari fallegu borg betur á eigin vegum. Upplagt er að taka sporvagninn gula, sem er eitt af helstu táknum Lissabon, og fara um hæðir borgarinnar og skoða gamla miðbæinn. Eins er áhugavert að heimsækja National Pantheon, sem var frá 16. öld hefðbundin kirkja en var árið 1916 breytt í undurfagurt hvelft grafhýsi, sem margir telja fallegustu byggingu Portúgals. Sá sem heimsækir Lissabon má alls ekki fara þaðan án þess að smakka pastel de nata, litlu eggjakremstartaletturnar sem má segja að sé þjóðareftirréttur Portúgala. Í miðbænum má finna hið fræga bakarí, Pasteis de Belem frá árinu 1837, en það þykir eitt besta pastel de nata bakaríið í Lissabon.

Í dag höldum við til bæjarins Setúbal sem hefur allt frá miðöldum verið mikilvæg saltverslunarmiðstöð. Í Setúbal er líka merkileg höfn en hér hófust sjókönnunarleiðangrar Portúgala sem leiddu af sér fjölmargar siglingaleiðir og landsvæði og færðu Portúgölum mikinn auð. Við göngum um þennan fallega bæ, sem frá 17. öld var staður aðalsmanna í Lissabon sem létu reisa hér stórhýsi og hallir, og sjáum meðal annars klaustrið Convento de Jesus og São Filipe kastalann. Á aðaltorgi bæjarins, Praça do Bocage, stendur São Juliao kirkjan en hún er frá því fyrir neðansjávarjarðskjálftann mikla.  Á bakaleiðinni verður komið við í einu elsta vínhúsi Portúgals þar sem við fáum vínkynningu og brögðum á afurðum þeirra.

Nú er komið að frjálsum degi og um að gera að kíkja í verslanir, kaffihús eða bara njóta og slaka á við hótelið. Fyrir þá sem vilja kynna sér áhugaverðar byggingar og komast í hreyfingu þá bendum við á São Jorge kastalann í Alfama hverfinu en hann stendur á hæð þar sem er fallegt útsýni yfir borgina og Tagus ánna. Márar byggðu kastalann á 10. öld en hann gengdi lykilhlutverki í vörnum Lissabon og var heimili konunga allt fram á 16. öld. Fyrir áhugasama þá bendum við á eina af perlum Lissabon, Híerónýmusarklaustrið, sem byggt var við upphaf landafundanna á 15. öld. Klaustrið er eitt af merkustu helgu mannvirkjum í heiminum og hefur verið á heimsminjaskrá UNESCO frá árinu 1983. Byggingin er fagurskreytt, einstaklega falleg og ber skýr merki þeirrar gullaldar sem ríkti þegar hún var reist. Skammt frá klaustrinu er að finna Siglingasafn Lissabon, sem er eitt af þeim bestu sinnar tegundar í Evrópu, Museu de Marinha. Þar er hægt að fræðast um siglingasögu Portúgals og sjá marga fallega og merka muni.

Í dag, páskadag, ætlum við að að skoða einn heilagasta pílagrímsstað landsins í Fatíma en þar á María mey að hafa birst og sagt fyrir um kraftaverk þar sem sólin dansaði á himninum. Við heimsækjum einnig fallega fiskimannaþorpið Nazaré þar sem sjá má einar stærstu öldur heims falla að ströndinni, enda er staðurinn heimsþekktur fyrir tilkomumikið brim og þangað sækja færustu sjóbrettakappar heims. Í Nazaré er gaman að fylgjast með skrautlegu mannlífinu og njóta útsýnis yfir víðáttumikið Atlantshafið. Við skoðum einnig fallega miðaldaþorpið Óbídos sem er eitt það best varðveittasta í Evrópu og eins og að ganga um í lifandi safni miðaldanna. Heillandi þröngar og steinilagðar götur, hvítkölkuð hús með rauðlitum þakstein og skreytt litríkum blómum, kastali sem gnæfir yfir byggðina og virkisveggir sem umlykja þorpið en á þeim er hægt að ganga og njóta útsýnis yfir þorpið og sveitirnar um kring. 

Það er komið að kveðjustund eftir ljúfa og skemmtilega ferð en þar sem flugið er ekki fyrr en í kvöld er tilvalið að nýta daginn og skoða sig enn betur um í hinni fallegu Lissabon. Upplagt er að fá sér kvöldverð inni í borg áður en lagt verður af stað út á flugvöll. Brottför þaðan er kl. 21:40 og lending í Keflavík kl. 01:10 að staðartíma.
Fararstjóri getur fært dagskrárliði á milli daga eftir þörfum þegar komið er á staðinn

• 7 nætur – Lissabon - Hotel Figueira