Aðventuveisla í Washington

Brottför frá Keflavík kl. 16:50 Mæting í Leifsstöð u.þ.b. 2,5 klst. fyrir brottför. Lending í Washington kl. 18:15 að staðartíma. Við keyrum inn í miðborgina að hótelinu okkar sem stendur skammt frá Hvíta húsinu. Höfuðborg Bandaríkjanna, Washington, var stofnuð 1790 samkvæmt stjórnaskrá landsins sem tók gildi 1789. Fylkin Maryland og Virginía gáfu eftir land svo borgin mætti rísa á bökkum ánna Potomac og Anacostia. Washington átti að vera sjálfstætt umdæmi fyrir utan önnur fylki landsins og er nefnd eftir einum stofnanda hennar, George Washington, sem valdi henni stað. Arkitektinn Pierre L’Enfant’s lagði grunn að skipulagi borgarinnar 1791. Washington er merkileg fyrir sitt sögulega og menningarlega gildi, þar eru mörg af þekktustu kennileitum landsins sem tengjast sögu þess og menningu, þar má finna helstu stofnanir landsins og þar er miðstöð stjórnmálanna. Það er mikið um græn svæði í Washington borg, húsin eru lágreist miðað við aðrar borgir landsins og mannlífið er fjölbreytt og alþjóðlegt.

Við hefjum daginn á ferð að þjóðardómkirkjunni í Washington sem er sjötta stærsta dómkirkja í heimi. Kirkjan er tengd ýmsum stórviðburðum og þar hafa farið fram útfarir þekktra einstaklinga. Dr. Martin Luther King flutti sína síðustu sunnudagsmessu úr predikunarstól kirkjunnar og þar hafa verið haldnar messur við vígslur forseta landsins og útfarir. Stór jarðskjálfti í ágúst árið 2011 olli talsverðum skemmdum á kirkjunni, það þurfti meðal annars að endurbyggja hluta hennar og stendur það ferli enn. Fallegir garðar umlykja kirkjuna. Næst er ferð okkar heitið í einn elsta hluta borgarinnar, Georgetown, þar sem við skiljum við rútuna. Upprunalega var bærinn stofnaður 1751 til þess að taka á móti skipum sem fluttu tóbak eftir Potomac ánni og staðurinn á sér merka sögu sem miðstöð verslunar, iðnaðar og vöruflutninga. Við röltum saman og skoðum ýmis önnur merk hús í hverfinu þar sem ýmsir af mektarborgurum Washington hafa búið, meðal annarra forsetahjónin John F. og Jacqueline Kennedy og leikkonan Elisabeth Taylor. Við göngum eftir Chesapeake og Ohio síkinu sem liggur samsíða Potomac ánni og skoðum m.a. elsta upprunalega hús Washington borgar, Old Stone House, en það er frá nýlendutímanum og í georgískum stíl. Nú er upplagt að skoða Georgetown nánar á eigin vegum, þar er úrval verslana og veitingastaða og litskrúðugt mannlíf. Þar gefur einnig að líta árlega ljóslistasýningu, Glow, sem er komið upp víða um bæinn. M Street er aðalgata Georgetown og hún er einnig helsta verslunargata Washington. Hægt er ganga meðfram Potomacánni í garði sem er við bakkann og þar er útsýni að Key Bridge brúnni og Kennedy Center þar sem Sinfóníuhljómsveit landsins og Þjóðaróperan hafa aðsetur sitt. Yfir vetrarmánuðina er mikið líf við höfnina í Georgetown (Washington Harbour), í aðdraganda jólanna má þar finna skautasvell undir berum himni. 

Þar sem við erum einstaklega vel staðsett í nágrenni Hvíta hússins þá byrjum við daginn á léttri göngu að Lafayette torgi sem stendur norðan við bústað forseta Bandaríkjanna. Þar blasir við kunnuglegt sjónarhorn af húsinu. Eftir stutt stopp förum við með rútu sem flytur okkur að syðri enda forsetagarðsins. Þar virðum við fyrir okkur aðra þekkta hlið Hvíta hússins og jólatré Washington búa sem stendur í hinum svo kallaða Ellipse garði, sunnan við girðingar Hvíta hússins. Þessu næst munum við skoða önnur helstu kennileiti í nágrenninu, minnismerki um George Washington, Thomas Jefferson, Martin Luther King Jr. og Abraham Lincoln. Við stoppum í Wharf þar sem er tilvalið að fá sér hádegisverð. Wharf er skemmtilega hannað bryggjuhverfi þar sem er urmull veitingastaða, kaffihúsa og verslana. Við viljum benda á að það er skemmtileg upplifun að fara í skoðunarferð um Washington á siglingu á Potomac ánni og er til að mynda hægt að fara í siglingu þar sem kvöldverður er innifalinn. Siglt er frá Wharf bryggjuhverfinu.