Aðventuljómi í Leipzig og Berlín

Dresden stendur við norðurbakka árinnar Saxelfi og er þekkt fyrir hrífandi útsýni, ríkulegan menningararf og fallegan arkitektúr. Þar standa tilkomumikil mannvirki og upp úr gnæfa turnar halla, kirkna og opinberra bygginga. Þar má finna stórkostleg listasöfn, hallir og hið fræga óperuhús Semper. Það er ótrúlegt að ímynda sér að borgin hafi nánast verið þurrkuð út í loftárásum bandamanna árið 1945. Miklum menningarverðmætum hafði verið komið í skjól áður en árásirnar hófust en hefur verið komið fyrir á ný í glæsilegum söfnum borgarinnar. Borgin varð á 15. öld aðsetur Wettiner furstanna en meðal afkomanda þeirra var Ágúst sterki sem átti umfangsmikinn þátt í að gera Dresden að þeirri fallegu borg sem kölluð var Flórens við ána Saxelfi. Gegnt klassíska hluta borgarinnar er hin nýja Dresden þar sem hægt er að finna fjöldann allan af fjölbreyttum veitinga- og kaffihúsum, verslunum og eitt líflegasta næturlíf í austurhluta Þýskalands. Við skoðum markverðustu byggingarnar og listaverkin í skoðunarferð um borgina en síðan gefst frjáls tími til að kanna umhverfið, skoða söfn eða setjast inn á kaffi- eða veitingahús. Í Dresden er fallegur og vinsæll jólamarkaður sem er einn sá elsti í landinu. Borgin er einnig þekkt fyrir Dresdner Christstollen, ávaxtajólabrauðið, sem á sér langa hefð og tilvalið er að smakka. Kvöldverður á eigin vegum.

Eftir góða daga í Leipzig og nágrenni höldum við nú til Berlínar þar sem gist verður næstu þrjár nætur á vel staðsettu 4* hóteli. Borgin er fjölmenningarleg og hefur upp á ótal margt að bjóða. Þangað sækja margir menningarþyrstir og staðurinn er aðdráttarafl fyrir listamenn hvaðanæva úr heiminum. Eftir að komið er til Berlínar síðdegis mun fararstjórinn kynna nánasta umhverfi Potsdamer svæðisins þar sem er upplagt að ylja sér á Glühwein á fallegum jólamarkaði þessa sögufræga torgs. Sameiginlegur kvöldverður á hóteli.

Hin sögufræga höfuðborg Berlín hefur verið aðsetur þjóðhöfðingja allt frá því hún var stofnuð á 13. öld og er í dag stærsta borg Þýskalands. Við hefjum daginn á skoðunarferð um Berlín þar sem litið verður á öll þekktustu kennileiti borgarinnar. Þar má nefna Brandenborgarhliðið, breiðgötuna Unter den Linden, þinghúsið Reichstag, minnismerki um helförina, rústir af Berlínarmúrnum og hina sögufrægu kirkju Kaiser-Wilhelm-Gedächtniskirche í vesturhluta borgarinnar. Arkitektúrinn er mjög áhugaverður hvað varðar bæði fornar byggingar og nýjar, eins og t.d. þinghúsið Reichstag og tónlistarhúsið Berliner Philharmonie. Eftir skoðunarferðina er upplagt að fá sér hádegisverð á einum af hinum fjölmörgu veitingastöðum borgarinnar áður en haldið er af stað á eigin vegum í rölt um borgina eða á einn af hinum fjölmörgu undurfögru jólamörkuðum. Kvöldverður á eigin vegum.

Í dag gefst tími til að kanna nánar á eigin vegum eitthvað af því sem fyrir augu bar í skoðunarferðinni, rölta um, fara á söfn, setjast inn á kaffihús og skoða mannlífið. Borgin er kraumandi suðupottur fjölmargra menningarheima, menning og listir eru í hávegum hafðar og þetta endurspeglast í listalífi borgarinnar og safnaflóru. Glæsilegar verslanir og ljósum prýddar verslunargötur laða að. Það er einstakur andi í Berlínarborg og hún er alveg sérstaklega heillandi á aðventunni. Kvöldverður á eigin vegum.

Þá er komið að lokum þessarar ferðar okkar um merkar borgir í austurhluta Þýskalands en flogið verður heim kl. 13:10 og lent í Keflavík kl. 15:50 að íslenskum tíma.
Fararstjóri getur fært dagskrárliði á milli daga eftir þörfum.