Aðventugleði í Tallinn & Helsinki

Brottför frá Keflavík kl. 7:30 og mæting í Leifsstöð u.þ.b. 2,5 klst. fyrir brottför. Lending í Helsinki kl. 13:00 að staðartíma þar sem við förum í skemmtilega skoðunarferð um miðborg Helsinki og skoðum m.a. Sibelius garðinn og Klettakirkjuna. Um kvöldið er siglt frá Helsinki til Tallinn. Ferjan leggur af stað úr höfn frá Helsinki klukkan 19:30 og komutími í Tallinn er 21:30. Það er upplagt að snæða kvöldmat á einum af nokkrum veitingastöðum sem eru um borð í ferjunni. Gist verður í 3 nætur á vel staðsettu 4* hóteli í Tallinn.

Dagurinn hefst á skoðunarferð með rútu um Tallinn. Við skoðum það helsta sem borgin hefur upp á að bjóða eins og Dómkirkjuhæðina (Toompea) og Kadriorg höllina, sem Pétur mikli lét útbúa fyrir eiginkonu sína Katrínu árið 1718. Rútan mun skilja hópinn eftir í gamla bænum og við förum saman í gönguferð um bæinn. Gamli hluti borgarinnar þykir einkar fallegur fyrir sínar gömlu og vel varðveittu byggingar í bland við gömul sovésk verksmiðjuhús sem hafa öðlast nýtt líf. Upplýstar byggingarnar setja einstaklega fallegan blæ á borgina. Gönguferðin endar á ráðhústorginu og þar á eftir gefst frjáls tími til að kanna umhverfið og njóta lífsins. Sameiginlegur kvöldverður á hóteli. 

Þessi fallega borg hefur upp á ótrúlega margt að bjóða, fallegar gamlar byggingar, söfn, hallir, kirkjur, lítil sæt kaffihús á hverju horni og nóg er af góðum veitingahúsum. Fyrir þá sem hafa áhuga á arkitektúr þá er afar áhugavert að heimsækja Rotermann Quarter í miðbæ Tallinn, milli gamla miðbæjarins og hafnarinnar. Þetta svæði var áður fyrr verksmiðjuhverfi í niðurníðslu og einkennist í dag af skemmtilegum nútímaarkitektúr. Það er um að gera að að njóta þessarar töfrandi borgar, kíkja í verslanir, á söfnin eða setjast á notalegt kaffihús og fylgjast með mannlífinu, dagurinn er í ykkar höndum.