Aðventuævintýri í Alsace

Freiburg er staðsett í suðurhluta Svartaskógar milli landamæra Frakklands og Sviss. Hennar er oft getið sem höfuðborgar skógarins. Við lítum við í Freiburger Münster dómkirkjunni en hún er eitt af meistaraverkum gotneskrar byggingalistar og helsta kennileiti borgarinnar. Í nágrenni kirkjunnar er skemmtilegur jólamarkaður og þar má meðal annars finna afar fallegt handverk og ýmislegt áhugavert fyrir sælkera. Hér verður gefinn frjáls tími til að upplifa hina líflegu Freiburg. Hún er alltaf heimsóknarinnar virði, sér í lagi á aðventunni. Tækifæri gefst til að líta inn til kaupmanna borgarinnar og njóta sín á einhverjum hinna fimm aðventumarkaða sem eru dreifðir um borgina. Kvöldverður á eigin vegum.

Colmar er hrífandi borg. Hér fara saman listilega gerð bindingsverkshús og þröngar, dulúðlegar götur. Listamannahverfið, litlu Feneyjar, er eitt fallegasta hverfið í borginni og þar er líkt og komið sé inn í ævintýri. Hér verður farið í fróðlega skoðunarferð um borgina en eftir það verður dagurinn í ykkar höndum. Nú er að njóta aðventutöfra bæjarins, líta inn í skemmtilegar litlar verslanir og setjast inn á notaleg kaffi- eða veitingahús í gamla bænum. Við endum daginn á að heimsækja vínbónda í Eguisheim sem er með fallegri bæjum Alsache héraðsins. Sameiginlegur kvöldverður á hóteli.

Við kveðjum við Obernai eftir yndislega daga og nú verður ekin Vínslóðin svonefnda í Alsace. Hún liggur frá Obernai en þaðan þræðum við ótal snotur smáþorp og gefum okkur góðan tíma til að stoppa í Riquewihr. Bærinn er ein af perlum Alsace héraðsins og er listilega skreyttur á aðventunni. Í nánast öðru hverju húsi bæjarins má finna vínkjallara með afurðum af svæðinu og víða er hægt að líta inn og smakka á framleiðslunni. Hér er þekkt jólabúð sem vert er heimsækja og hefðbundinn jólamarkaður. Þessu næst verður ekið sem leið liggur að Bodensee vatni sem er þriðja stærsta stöðuvatn í Evrópu og á landamæri að Þýskalandi, Austurríki og Sviss. Ferðinni er heitið í borgina Konstanz sem stendur við vesturenda Bodensee. Þar verður gist í tvær nætur á góðu hóteli í miðbænum. Sameiginlegur kvöldverður á hóteli.

Lista- og menningarborgin Konstanz er fallegasta borgin við Bodensee vatnið. Við byrjum morguninn á stuttu rölti þar sem við kynnumst sögu og menningu borgarinnar. Við munum að sjálfsögðu njóta aðventustemmningar á jólamarkaði borgarinnar en eftir það er upplagt að kíkja á hvað kaupmenn staðarins hafa upp á að bjóða. Hótelið er vel staðsett í miðbænum svo hér gefst gott tækifæri til að nota daginn eins og hver og einn vill. Það er til dæmis hægt að fara í siglingu á vatninu og koma við í nágrannabæjunum. Einnig er mikið af notalegum kaffi- og veitingahúsum sem upplagt er að líta inn á. Kvöldverður á eigin vegum.

Nú kveðjum við Konstanz við Bodensee eftir ljúfa daga. Að morgunverði loknum verður lagt af stað út á flugvöll í Zürick og flogið heim kl. 13:05. Lending í Keflavík er kl. 15:55 að staðartíma. 

Fararstjóri getur fært dagskrárliði á milli daga eftir þörfum þegar komið er á staðinn.