26. nóvember - 3. desember 2024 (8 dagar)
Aðventuævintýrið byrjar í borginni Obernai í Alsace héraði þar sem fallegustu aðventumarkaðir Frakklands finnast. Nú skarta borgir og bæir sínu fegursta hvert sem farið er og ilmur frá jólaglöggi og kastaníuhnetum svífur yfir. Í Obernai er dásamlegt á þessum árstíma, borgin er þekkt fyrir haganlega gerð bindingsverkshús og sérlega notalegt andrúmsloft, ljósadýrðin er mikil og þar er fallegur jólamarkaður. Við förum í skemmtilegar dagsferðir m.a. til Strassburg, höfuðborgar Alsace héraðsins, sem er sérstaklega glæsileg á aðventunni. Colmar er einnig falleg og hrífandi borg á þessum árstíma og þekkt fyrir listileg bindingsverkshús og krókóttar þröngar götur sem eru einstaklega töfrandi. Í Colmar má finna listamannahverfið Litlu Feneyjar og þar eru lítil falleg síki sem gleðja augað. Það er alltaf gaman að heimsækja Freiburg í Svartaskógi en hún er borg skógarins, gotneskrar listar og víns. Aðventublærinn fylgir okkur um vínslóðina í Alsace þegar við kveðjum Obernai á leið okkar að Bodensee vatninu í Þýskalandi. Á leiðinni þangað verður áð í bæjarperlunni Riquewihr og þar upplifum við áhrifamikla jólastemmningu inn á milli gömlu bindingsverkshúsanna. Við endum ævintýrið á ljúfri samveru í fallegu borginni Konstanz við Bodensee vatnið sem er einstaklega heillandi á aðventunni.