Bled vatn & króatískar strendur

Nú kveðjum við dásemdina við Bled vatn og tökum stefnuna á Istríaskagann í Króatíu. En á leiðinni þangað verður stoppað í Ljubljana, höfuðborg Sóveníu og stærstu borg hennar, sem telst ein grænasta og líflegasta höfuðborg Evrópu. Borgin er hrífandi og Ljubljanica áin rennur um hjarta hennar. Þar verður farið í skemmtilega skoðunarferð og eigum við frjálsan tíma til að fá okkur hressingu áður en ekið verður suður til Poréc í Króatíu sem er yndislegur bær við Istríaströndina en þar verður gist í fimm nætur á góðu hóteli við ströndina. Á hótelinu er glæsilegt útisvæði með sundlaugum og sólbekkjum. Einnig er þar heilsulind með saunu og hvíldarherbergi og hægt að bóka sér ýmsar heilsumeðferðir gegn gjaldi

Umhverfið er dásamlegt og við njótum þess á skemmtilegri göngu eftir ströndinni inn í miðbæ Poreč, sem er einn elsti bærinn við ströndina. Farið verður í stutta skoðunarferð um þennan yndislega bæ sem skartar marmaralögðum götum og fögrum byggingum. Þar er að finna áhugaverða basilíku sem kennd er við himnaför Maríu. Hún er frá 6. öld og var skráð á heimsminjaskrá UNESCO árið 1997. Auðvelt er að finna skemmtilegar verslanir, þar á meðal fjölmargar skartgripaverslanir. Eftir skoðunarferðina verður frjáls tími til að kanna líf bæjarbúa og fá sér hressingu.

Skemmtilegur dagur í Króatíu sem byrjar á því að aka fagra leið um Istríaskagann. Á leiðinni verður stoppað fyrir ofan Limski Canal en þar þrengir fjörðinn svo mjög að hann minnir heldur á skurð. Síðan verður ekið til Rovinj í Króatíu. Rovinj er yndislegur, litríkur listamannabær við Istríaströndina sem iðar af mannlífi. Hér verður farið í stutta skoðunarferð um elsta hluta bæjarins, gengið verður upp að barokkkirkju heilagrar Euphemíu en þaðan er glæsilegt útsýni yfir eyjarnar og gamla bæinn. Úti fyrir Rovinj eru 22 eyjur, stærst þeirra er eyjan Sveta Katharina og sést hún vel frá gamla bænum. Einnig munum við halda niður listamannagötuna. Eftir góðan tíma þar verður ekið til Pazin þar sem vínbóndi verður sóttur heim og borðaður hjá honum léttur hádegisverður. Þar verður eflaust sungið og trallað.

Nú verður ekið til litla bæjarins Fazana en þaðan verður farið í skemmtilega siglingu út í eyjuna Veliki Brijuni, sem er stærsta eyja Brijuni eyjaklasans úti fyrir Istríaströndinni. Eyjaklasinn samanstendur af 14 eyjum en þar er ótrúleg náttúrufegurð og gróðursæld. Tító, einræðisherra Júgóslavíu, fundaði hér á árum áður með valdamestu kommúnistaleiðtogum heims og þá var það ekki á færi margra að vera boðið á þennan eðalstað. Sjálfur dvaldi hann oft og tíðum hér með merka gesti víðsvegar að úr heiminum. Upphafið að fjölskrúðugu dýralífi eyjunnar er frá tímum Tító en m.a. má finna muflon sauðfé, sebrahesta, lamadýr og fíla svo eitthvað sé nefnt. Eyjan var opnuð almenningi árið 1983 eftir dauða Títós. Við höldum í fróðlega skoðunarferð um eyjuna en hér má til að mynda sjá mjög áhugavert myndasafn frá tíma Títós í einni villu eyjunnar.

Í dag verður rólegur dagur í Poreč. Upplagt er að fara í göngu með ströndinni og kanna betur líf bæjarbúa. Einnig eru í boði töfrandi siglingar frá höfninni í Poreč m.a. inn í Limski Canal.

Nú kveðjum við Istríaskagann og Poreč eftir yndislega daga því nú bíður okkar Veróna, elsta borg Norður-Ítalíu. Veróna er borg menningar og lista en frægust er hún sem sögusvið leikrits Shakespeare um Rómeó og Júlíu. Ekið verður á hótel í Veróna þar sem gist verður síðustu tvær nætur ferðarinnar. Eftir komuna til Veróna er frjáls tími til að skoða sig um í nágrenninu.

Farið verður í skoðunarferð um Veróna og staldrað við helstu staði þessarar merku borgar. Þar má nefna þriðja stærsta hringleikahús veraldar, Arena, og Kryddtorgið en þar stendur fjöldi fagurra bygginga og minnisvarða. Miðbær borgarinnar eins og hann leggur sig er skráður á heimsminjaskrá UNESCO og ekki að ástæðulausu. Eftir skoðunarferðina um borgina verður gefinn frjáls tími til að fá sér hressingu og kanna líf bæjarbúa 

Það er komið að heimferð eftir góðan morgunverð og ljúfa ferð. Nú er stefnan tekin á Mílanó. Brottför þaðan kl. 15:30 og lending í Keflavík kl. 17:45 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Bled = Rikili Balance Hotel
Porec = Hotel Valamar Parentino í Porec
Veróna = Hotel Leon D´Oro