Fljótasigling á Rhône & Saône

Eftir morgunverð gefst tími til að rölta um elsta hluta hinnar fornu, rómversku borgar Mâcon. Ráðhúsið og fleiri byggingar minna á blómatíma hennar sem höfuðborg Saône-et-Loire svæðisins. Þarna er að finna eitt elsta apótek landsins frá 1761 og það er sannarlega þess virði að skoða. Borgin gegndi lykilhlutverki í starfi frönsku andspyrnuhreyfingarinnar í seinni heimstyrjöldinni og var fyrsta borgin á frísvæðinu milli Parísar og Lyon. Á meðan við borðum hádegisverð á skipinu líðum við áfram á siglingu til Belleville og upplifum töfrandi náttúrufegurð á leið fram hjá Côtes du Rhône, Maconnais og Beaujolais vínökrum. Eftir hádegisverð er skoðunarferð í landi. Við ökum um Beaujolais vínræktarhéraðið og skoðum áhugavert vínsafn, Hameau du Vin í Romanèche-Thorins. Við kveðjum að sjálfsögðu ekki svæðið án þess að smakka hin frægu vín héraðsins. Skipið bíður okkar í Belleville og siglingin heldur áfram til Lyon. Við snæðum kvöldverð um borð en skipið kemur til hafnar að kvöldi og liggur við festar hjá Lyon yfir nóttina.

Eftir morgunverð höldum við í skoðunarferð um Lyon, sem er önnur fjölmennasta borg landsins. Við skoðum elsta hluta borgarinnar, St. Jean, sem stendur á tanganum við ármót Rhône og Saône. Torgin Place des Terreaux og Place Bellecour í St. Jean teljast með stærstu torgum Evrópu. Hádegisverður er snæddur um borð og siglingin heldur áfram suður ána Rhône til vínbæjarins Tain-l’Hermitage. Leiðin er rómantísk og fögur, siglt verður hjá gömlu, rómversku borginni Vienne en borgin geymir umtalsverðar minjar frá tímum Rómverja, s.s. hof Ágústusar. Við siglum áfram og við tekur Condrieu héraðið, hjarta Côtes du Rhône sem þekkt er fyrir einstaklega gjöfula vínakra. Kvöldverður verður snæddur um borð. Skipið kemur að kvöldi til bæjarins Tain l’Hermitage en þar eru einir frægustu vínakrar Frakklands. Þarna liggur skipið við festar yfir nóttina og er upplagt að fara í bæjarrölt um Tain l’Hermitage eftir kvöldverð.

Að morgni heldur þessi heillandi sigling áfram, fram hjá kastalanum La Voulte, Tournon og háskólaborginni Valensa til St. Etienne des Sorts. MS Mistral leggur að landi á meðan við borðum hádegisverð. Eftir hádegi verður ekið um hið stórfenglega Ardèche gil, sem er 300 m hátt og 30 km að lengd, en mikill kraftur árinnar Ardéch hefur sorfið sig inn í bergið og myndað hella, boga og skör eins og Pont-d-Arc sem er 34 m á hæð. Á leið okkar njótum við stórkostlegs útsýnis yfir þetta villta landslag. Við höldum síðan aftur til skips og ljúflega siglum við áfram, fram hjá Roquemaure, Pont-St-Esprit og Donzère-Mondragon en þar verður farið um stóran skipastiga. Áður voru þarna miklar flúðir en fljótið hefur verið tamið með sterkum varnargörðum og skipastigum. Þessi gamla leið frá Miðjarðarhafi til norðurhluta Evrópu var sú eina sem lá ekki yfir fjallgarða. Á þessum slóðum stigu Rómverjar sín fyrstu skref til yfirráða í Gallíu og skildu alls staðar eftir sig ummerki. Komið verður að landi í Avignon seint um kvöldið en frá ánni skín borgin eins og glitrandi perla.

Eftir morgunverð verður haldið í skemmtilega skoðunarferð um Avignon. Borgarmúrarnir um gamla bæinn hafa varðveist með eindæmum vel en innan þeirra er að finna fjölda sögufrægra staða. Við munum staldra við nokkra þeirra á göngu okkar um borgina, s.s. Palais des Papes, höllina sem var íverustaður páfans á 14. öld, dómkirkjuna og það sem eftir er af brúnni Saint-Bénézet. Á meðan við snæðum hádegisverð á skipinu léttum við akkerum og siglum fallega leið til Arles. Síðdegis gefst tími til að skoða sig um í þessari einstöku borg, sem er ein af perlum Suður-Frakklands. Við göngum að hinu margrómaða rómverska hringleikahúsi og safni Van Gogh en listamaðurinn dvaldi í bænum um tíma og málaði þar mörg sín þekktustu verk, þ.á m. Gula kaffihúsið. Skipið liggur hér í höfn í nótt. Um kvöldið njótum við glæsilegs hátíðarkvöldverðar og skemmtiatriða á veitingastað skipsins og eigum góða stund saman.

Í dag förum við með rútunni í ferð um Camargue svæðið, sem er friðlýst vatnasvæði myndað af framburði Rhône. Þar má sjá hópa af flamingóum, svörtum nautum og hvíta, arabíska hesta. Á þessari leið verður komið við í strandbænum Saintes Maries de la Mer, sem er pílagrímsbær evrópsks rómafólks. Eftir það verður ekið til Port St. Louis vestur af Marseille, þar sem hádegisverður bíður okkar um borð. Nú leggur skipið af stað í siglingu út í Fos flóann, gegnum þröngan skipaskurð til Martigues við Rhônedelta óshólmann, en þar rennur áin út í Miðjarðarhafið. Martigues minnir um margt á Feneyjar, þar má sjá litrík hús standa við falleg, brúuð síki sem tengja bæinn saman, enda hefur hún verið kölluð Feneyjar Provence héraðsins.

Það er komið að heimferð eftir yndislega og ljúfa daga. Að loknum morgunverði kveðjum við áhöfnina á fljótaskipinu og ökum sem leið liggur til Barcelona flugvallar. Vinsamlegast athugið að það er talsverður akstur til að komast á flugvöllinn en að sjálfsögðu verða gerð góð stopp á leiðinni. Brottför frá Barcelona flugvelli kl. 22:40 og lending í Keflavík kl. 01:20 að staðartíma, aðfaranótt 9. ágúst. 

Fararstjóri getur fært dagskrárliði á milli daga eftir þörfum þegar komið er á staðinn.

• 31. júlí - 2. ágúst - Annecy -  Novotel Annecy Centre.
• Gisting í 6 nætur á MS Mistral í káetu.