Seiðandi Sardinía

Framundan er skemmtilegur dagur sem byrjar á góðum morgunverði. Við höldum síðan í dagsferð eftir gullinni Costa Smeralda ströndinni, þar sem sægrænt hafið ber við sjóndeildarhringinn og loftið ilmar af macchia gróðri. Við ökum til Porto Rotondo sem er huggulegur strandbær við kyrrláta vík og eftir góða stund þar verður haldið áfram til Porto Cervo, hins heimsþekkta og vinsæla ferðamannabæjar. Porto Cervo var stofnaður árið 1962 af Karim Aga Khan IV sem lúxus sumardvalarstaður. Hér er fagurt um að lítast, kristaltær sjór og hvítar strendur með glæsilegum sumarhúsum og lúxusverslunum. Porto Cervo hefur laðað að ýmsar stjörnur yfir sumarmánuðina til að njóta bæði slökunar og skemmtunar, þar með talið meðlimi evrópskra konungsfjölskyldna. Hér gefum við okkur góðan tíma til að njóta dýrðarinnar. Það er upplagt að setjast niður, fá sér hressingu og njóta staðar og stundar.

Á þessum ljúfa degi ætlum við að heimsækja hrífandi fjallabæinn San Pantaleo, listamannabæ með rómverskum minjum, kirkju og híbýlum hirðingja frá miðöldum sem kölluð eru Stazzi. Þetta er litríkur bær þar sem við ætlum að gefa okkur góðan tíma og njóta þessa að skoða lítil gallerí og fjölbreitt handverk íbúanna. Hér er einn vinsælasti útimarkaður norður Sardiníu og auðvitað skoðum við okkur um þar. Upplagt er að fá sér hressingu áður en ekið verður á hótel.

Rólegheit og slökun er á dagskrá okkar í dag í Baja Sardinia. Nú er upplagt er að njóta aðstöðunnar við hótelið og baða sig í náttúrufegurð staðarins. Tilvalið er að fara í göngu með ströndinni eða taka góðan sundsprett í sjónum. Einnig er hægt að rölta um og kanna umhverfið betur, líta inn á kaupmenn staðarins og fá sér hressingu.

Við höldum í siglingu yfir til La Maddalena eyjaklasans en hann samanstendur af sjö eyjum. Við verjum deginum á höfuðeyju klasans, La Maddalena. Farið verður í líflega skoðunarferð þar sem við kynnumst sögu og menningu eyjarskeggja. Einnig eyðum við drjúgum hluta dagsins á samnefndum höfuðstað eyjanna. Eyjunum er gjarnan líkt við eyjurnar í Karabíska hafinu sökum fallegra strandanna og tærs sjávarins sem er einstaklega túrkís blár. Hér er upplagt að slaka á í dásamlegu miðjarðarhafsloftslaginu undir pálmatré eða rölta og skoða sig um.

Nú kveðjum við Baja Sardinia við Costa Smeralda ströndina eftir yndislega daga. Stefnan er tekin á Alghero en á leiðinni umvefur okkur fjallafegurð Barbagía hálendisins. Þar er rík hefð fyrir hjarðmennsku og tengingin við sauðfjárrækt og framleiðslu er stór þáttur í lífi þeirra sem hér búa. Hér hefur verið ræktað sérstakt sauðfjárkyn í árþúsundir og heimamenn eru mjög stoltir af Pecorino Sardo ostinum sem þeir framleiða. Við komum til bæjarins Orgosolo sem er þekktastur fyrir fjölbreytilegar veggmyndir eða Murales sem finna má á húsum bæjarins. Þessi vegglistaverk veita innsýn í daglegt líf og skoðanir íbúanna en upphafið að þessum teikningum er frá árinu 1968 þegar leiklistarhópur frá Mílanó hélt sýningu í bænum. Að skoðunarferð lokinni verður boðið upp á hádegisverð að hætti hjarðmanna með þjóðlagasöng og dansi en þessi stund er mikil upplifun og alltaf mjög skemmtileg. Við ökum síðan áleiðis til Alghero en á leiðinni þangað verður stoppað við Santa Antine, þar sem finna má einhverjar merkustu fornminjar Sardiníu. Hér er um að ræða konunglegar minjar frá bronsöld sem endurspegla Nuragehe menninguna sem þróaðist á eyjunni frá 14. - 8. aldar f. Kr. Í Alghero verður gist í fimm nætur á góðu hóteli með einkaströnd og útisundlaug.

Í dag heimsækjum við fagra miðaldabæinn Castelsardo í Sassari héraðinu. Á leiðinni þangað verður staldrað við Roccia dell‘ Eleante, eða Fílaklettinn. Bærinn Castelardo var reistur árið 1102 af Doria fjölskyldunni frá Genúa, sem var ein sú valdmesta á sínum tíma, en þau stjórnuðu mörgum landsvæðum bæði á landi og á eyjunum í Miðjarðarhafi. Við förum í skemmtilega skoðunarferð í þessum yndislega bæ og göngum um þröngar, litlar göturnar í elsta hluta bæjarins. Eftir skoðunarferð verður frjáls tími til að fá sér hressingu. Næst verður ekið með Capo Caccia, sem er tilkomumikill höfði á norðvesturströnd Sardiníu, en hann hefur löngum verið mikilvægt kennileiti sjófarenda við Sardínu. Hér er heillandi landslag, stórkostlegt útsýni og mikil saga en mannvistarleyfar allt aftur til seinni hluta steinaldar hafa fundist í hellunum við höfðann. Í sjónum úti fyrir eru góð veiðisvæði og það er rótgróin hefð fyrir fiskveiðum við höfðann í gegnum árþúsundir. Í lok dags heimsækjum við ólífu- og vínbónda í nágrenni Alghero.

Í dag ætlum við að eiga yndislegan dag í virkisbænum Alghero. Hann er norðvestan megin á Sardiníu í Sassari héraði og er vafalaust einn sá fallegasti og skemmtilegasti á eyjunni. Alghero tilheyrði um tíma konungsríki Aragons frá Spáni. Katalónar gáfu bænum þetta nafn og katalóníska er opinbert tungumál eyjarskeggja. Við höldum í skemmtilega skoðunarferð um helstu staði og að henni lokinni er upplagt að fá sér hressingu og skoða sig betur um í bænum sem iðar af mannlífi. Eftir það verður gengið að kóralverkstæði en borgin er víðfræg fyrir skartgripi úr rauðum kórölum.

Þessi ljúfi dagur byjar á stuttri göngu inn í Alghero en þaðan verður farið í ævintýralega siglingu að Neptúnusar helli. Hann er meðal stórkoslegustu sjávarhella Miðjarðarhafssvæðisins og að koma þangað er einstök upplifun. Talið er að hellirinn hafi myndast fyrir um tveimur milljónum ára. Inni í honum er heillandi sjónarspil dropasteina, ljómandi hvítrar sandstrandar og risastórs neðanjarðar vatns. Eftir siglinguna er fjáls tími í Alghero fram að kvöldverði.

Frjáls dagur til að njóta að vera á þessum dásamlega stað. Upplagt er að ganga inn í Alghero og njóta bæjarins á eigin vegum. Rölta um, líta inn í skemmtilegar verslanir, sitja á skemmtilegu kaffi-eða veitingahúsi og horfa á mannlífið. Einnig er upplagt að nota góða aðstöðu við hótelið okkar.

Nú kveðjum við stórkostlegu eyjuna Sardiníu eftir yndislega og ljúfa daga. Við leggjum af stað mjög snemma í morgunsárið til Porto Torres en þar býður okkar ferja til Barcelona á Spáni. Við komum til Barcelona höfuðborgar Katalóníu undir kvöld. Gist verður þar í eina nótt á góðu hóteli.

Nú líður að lokum þessarar frábæru ferðar. Brottför frá Barcelona flugvelli kl. 15:45 og lending í Keflavík kl. 18:20 að staðartíma.