Aðventutöfrar í Tíról

Brottför frá Keflavík kl. 7:20. Mæting í Leifsstöð u.þ.b. 2,5 klst. fyrir brottför. Lending í München kl. 12:05 að staðartíma. Við ökum af stað á gististað en á leiðinni verður komið við í þýska bænum Garmisch-Partenkirchen þar sem hægt er að fá sér síðdegishressingu áður en haldið er áfram til Tíról í Austurríki eða nánar tiltekið til Seefeld. Þetta er yndislegur bær inn á milli fjallanna í 1180 m hæð og þar gistum við fimm nætur á góðu hóteli í miðbænum. Á hótelinu er notaleg heilsulind, sundlaug, sauna, eimbað með salt- og ilmstillingu, innrauður hitaklefi og kalt ker.

Eftir góðan morgunverð förum við saman í göngutúr um bæinn og kynnum okkur umhverfið. Um hádegi er lagt af stað til litla bæjarins Mittenwald sem stendur í Isar dalnum við rætur Karwendel fjallgarðsins. Hann er þekktur fyrir fallega myndskreytt hús þar sem sjá má vísanir í sögu og þjóðfræði Bæjaralands. Í Mittenwald er aldagömul hefð fyrir smíði strengjahljóðfæra og þar er skemmtilegt fiðlusafn. Frumkvöðullinn Matthias Klotz nam fiðlumíði á tímum Stradivari á Ítalíu og kenndi hana í Mittenwald sem varð svo seinna ein af helstu miðstöðum í smíði strengjahljóðfæra í Evrópu. Frá Mittenwald förum við til Garmisch-Partenkirchen í Þýskalandi sem er einn þekktasti skíðabær landsins. Fyrir ofan hann stendur hæsta fjall Þýskalands, Zugspitze. Garmisch-Partenkirchen er töfrandi á þessum árstíma og ilmur jólanna svífur yfir aðventumarkaðinum. Hér er upplagt að fá sér hressingu, en það tilheyrir að fá sér heitt jólaglögg á göngu um jólamarkaðinn. Hægt er að fara með hestvagni eða sleða um bæinn, sem er mjög huggulegur á þessum árstíma, og njóta um leið náttúrufegurðarinnar allt um kring.

Við hefjum daginn á að aka til Wattens þar sem Swarovski kristalssafnið er til húsa en þar glitrar á ýmis djásn. Áfram höldum við til Innsbruck, höfuðborgar Tíról, sem er umvafin fjöllum og tindrandi náttúrufegurð. Innsbruck var ein af borgum Habsborgaranna, einnar mikilvægustu valdaættar Evrópu. Blómatími hennar var á 15. öld undir stjórn Maximilian I. af Habsborg. Hann lét byggja helsta kennileiti borgarinnar, húsið með gullþakinu, sem stendur við eitt fallegasta torgið í Tíról. Farið verður í stutta göngu með fararstjóranum en eftir það verður frjáls tími til að kanna borgina á eigin vegum. Borgin er sérstaklega ævintýraleg á aðventunni því borgarbúar nota gjarnan Grimmsævintýrin sem þema í skreytingunum. Tilvalið er að líta inn til kaupmanna í Maria-Theresien götunni en þar er einnig mikil jólastemning.