Alpafegurð & Portorož

Þennan góða dag er tilvalið að slaka á í Filzmoos fram undir hádegi og kanna umhverfið í þessum litla bæ. Um hádegi verður boðið upp á ferð með hestakerru upp að Unterhofalm selinu sem er við rætur Bischofsmütze fjallsins en þar er náttúrufegurðin óviðjafnanleg. Þar byrjum við á því að fara í smá göngu um Almsee vatnið og upp að kapellu. Síðan er upplagt að fá sér hádegishressingu og njóta fegurðar staðarins áður er haldið verður til baka.

Yndislegur dagur í fæðingarborg Mozarts, Salzburg. Borgin er þekkt fyrir byggingar í barokkstíl og hefur verið á heimsminjaskrá UNESCO síðan árið 1996 en Salzburg er í hugum margra hin eina sanna perla Austurríkis. Við hefjum daginn á skoðunarferð um borgina, skoðum Mirabellgarðinn og göngum eftir Getreidegasse sem er með elstu og þekktustu götum borgarinnar en þar er að finna mjög áhugavert Mozartsafn. Einnig verður haldið upp í kastalann Hohensalzburg en þar var hluti kvikmyndarinnar Söngvaseiðs eða Sound of Music tekinn upp. Stórkostlegt útsýni er þaðan yfir Salzburgerland og borgina.

Við yfirgefum Austurríki og ökum til Portorož í Slóveníu eða Rósahafnarinnar svokölluðu, þar sem gist verður í fimm nætur. Á leiðinni þangað verður ekið að Bled vatni í Slóveníu sem er með fegurstu perlum Alpanna en þar höldum við í siglingu út í eyjuna Blejski Otok. Þar er hugguleg Maríukirkja með frægri óskabjöllu og landslagið draumkennt. Auðvitað verður tími til að fá sér hressingu og njóta náttúrufegurðar staðarins áður en ekið verður til Portorož. Á hótelinu okkar er inni- og útisundlaug og einkabaðströnd.

Nú ætlum við að skreppa yfir til Poreč í Króatíu sem er yndislegur bær við Istríaströndina. Uhverfið er dásamlegt en bærinn er einn sá elsti við ströndina. Farið verður í stutta skoðunarferð um bæinn sem skartar marmaralögðum götum og fögrum byggingum. Þar er að finna áhugaverða basilíku sem kennd er við himnaför Maríu. Hún er frá 6. öld og var skráð á heimsminjaskrá UNESCO árið 1997. Auðvelt er að finna skemmtilegar verslanir, þar á meðal fjölmargar skartgripaverslanir. Eftir skoðunarferðina verður frjáls tími til að kanna líf bæjarbúa og fá sér hressingu. Eftir hádegi verður ekið aftur til Portorož en þá ætlum við að njóta þess að vera á þessum fagra stað og kanna umhverfið. Tilvalið er að nýta sér frábæra aðstöðu hótelsins til afslöppunar en einnig er skemmtilegt að ganga eftir ströndinni eða taka sér sundsprett í Adríahafinu.

Í dag ætlum við að njóta þess að vera á þessum fagra stað og kanna umhverfið saman. Tilvalið er að nýta sér frábæra aðstöðu hótelsins til afslöppunar en einnig er skemmtilegt að ganga eftir ströndinni eða taka sér sundsprett í Adríahafinu.

Frá Portorož gefst áhugasömum tækifæri á að sigla til sjávarþorpanna Izola og Piran, sem eru sannkallaðar perlur Istríastrandarinnar. Í Izola stígum við í land í stuttan tíma en höldum svo ferðinni áfram til Piran, yndislegs bæjar sem áhugavert er að skoða. Þar fæddist fiðluleikarinn og tónskáldið Tartini en minnisvarði um hann stendur á hinu glæsilega Tartini torgi. Eins er gaman að skoða Georgskirkjuna sem stendur tignarleg á fallegum stað við ströndina.

Rólegheita dagur í Portorož og nú er upplagt að nota aðstöðuna við hótelið eða fara í göngu með strandlengjunni, jafnvel yfir til Piran. Í bænum kennir einnig margra grasa menningar- og mannlífs, sem gaman er að kynna sér í rólegheitunum.

Nú er komið að því að kveðja Slóveníu eftir dásamlega daga. Við ökum til Feneyja og byrjum þar á ljúfri siglingu inn í borgina frá bílastæðinu. Auður og íburður blasir hvarvetna við og á vegi okkar verða stórfenglegar sögulegar byggingar eins og hertogahöllin sem er ein glæsilegasta bygging borgarinnar. Við skoðum líka Markúsartorgið þar sem Markúsarkirkjan stendur. Hún er ein merkilegasta kirkjubygging veraldar, byggð í austrænum stíl og minnir á höllina úr ævintýrinu 1001 nótt. Við komum að hinni frægu Rialto brú sem liggur yfir Canal Grande skurðinn en hann mun vera 3,8 km langur og 900 m breiður og við hann standa hvorki fleiri né færri en 200 hallir. Síðdegis mun hverjum og einum gefast tími til þess að skoða þessa fallegu borg betur og njóta mannlífsins. Upplagt er að fá sér kvöldverð í borginni áður en siglt verður til baka . Ekið verður út á flugvöll í Feneyjum. Brottför þaðan kl. 22:05 og lent í Keflavík kl. 00:40 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.